కట్టా శ్రీనివాస్ || హరియాలీ సలాం ||

నీవోక పచ్చని చెట్టయిన రోజు

పిట్టలు అవే వచ్చివాలితే.

పుట్టింటి బిడ్డల స్పర్శకు పులకింతలతో పరవశించావు.



నీపై పువ్వులు విరబూసి నవ్వినపుడు

మధుపాలు ఆశగా మదువుని గ్రోలి గోలచేస్తే.

మనువళ్ల అల్లరికి ముద్దోచ్చి మురిసిపోయావు.



తొలిపిందెల రుచి చూస్తూ

కసరుగాయల పసచాలక కసిరింతలు కావలించుకుంటే.

కడుపున పుట్టిన వాళ్ల తప్పును వెనకేసుకొచ్చేతల్లిలా నిలబడ్డావు.



ఒక్కోపండూ తయారై తలలూపుతుంటే.

అదేమిటో రాళ్లిలా వచ్చిపడుతున్నాయి.

గాయం బాధకన్నా రాలే పండ్లను చూస్తే

నీ కళ్ళలో నీళ్ళు తిరుగుతున్నాయి.



నీవోక పచ్చని చెట్టువు కాబట్టే

నీలో పచ్చదనం వుండబట్టే

ప్రపంచం నీవైపు చూస్తోంది

మంచో చెడో మాట్లాడుతోంది.

http://www.facebook.com/groups/kavisangamam/permalink/438728769513214/ 

· 28-08-2012