గుంపులో గోవిందా ? భజగోవిందం భజగోవిందం గోవిందం భజే మూఢమతే!

Where the Clear Stream of Reason has not lost its way into the dreary desert sand of dead habits. -Tagore

చిన్నప్పటి క్లాసుల్లో చేతిచుక్క ఆటన్నారు మిత్రులు

నా చేతిని వాళ్ళకు చిక్కనీకుండా తప్పుకొచ్చేశాను.

రోడ్డమ్మట గుమ్మిగూడి మాబ్ డ్యాన్సులన్నారు.

గుంపులో గోవిందకొట్టకుండా గడుపుకుంటూ వచ్చాను.

అప్పుడెప్పుడో జిరాఫీ తలలుపెట్టుకుంటున్నారు.

తలుపు తీయటం తెలియని వాళ్ళను కదా నాకెందుకులే అనుకున్నాను.

మొన్నీమధ్య మంచులాంటినీళ్ళబకెట్ ను నెత్తినగుమ్మరించుకున్నారు.

నా తలమీదకు తేలేదుగా అని తప్పుకున్నాను.

ఆతర్వాత రైసుబకెట్టిచ్చావా అని చెప్పుకుంటున్నారు.

మాయింట్లో మాటలు కాదుగా అని మర్చిపోయాను.

ఇవ్వాల పుస్తకాలు చదివావా అంటూ 

నా పేరునే ముడేసారు. తప్పదుగా నాలుగుముక్కలూ చెప్పుకుంటున్నాను.

↕♫↕ కోరె గ్రిఫిన్ అనే ఆయన పుర్రెసంభందిత అమియోట్రోపిక్ లేటరల్ స్ల్కెరాసిస్(ఎఎల్‌ఎస్) అనే వ్యాధి నివారణకోసం ఫండ్ సేకరించాలంటే సింఫతీవల్లనో, ఎంఫతీవల్లనో డబ్బులు రాలవు. మేనియా తోకకు మంటలు అంటించాల్సిందే అనుకున్నాడు. నిజంగానే అణువిచ్చిత్తి శృంఖలంలాగా ఈ చైన్ సిస్టమ్ ఎప్పట్లానే రెచ్చిపోయి విస్తరించింది. ఈ వ్యాధి మరీ తక్కువగా వున్న మనదేశం లో కూడా అసలు ఎందుకు నెత్తిన పోసుకోవాలో తెలియక పోయినా ఐదుపైసలు ఆ సంస్థకు ఇవ్వాలేమో అనే ఆలోచన లేకపోయినా, నీళ్లేకదా పోసుకుంటే ఏముంది? మొక్కే కదా అని పీకేస్తే పీకకోస్తా అనే ఫ్యాక్షన్ హీరోలు ఎవరున్నారులే అనుకుంటూ మంచి పబ్లిసిటీ అని దూసుకెళ్ళే వాళ్ళమీద నీళ్ళుగుమ్మరించేంత పూనకంతో ఊగుతుంటే.....

♫♫♫ కొంచె తేరుకుని మరోకోణంలో ఈ ‘మంద’బుద్ధుల్ని మళ్ళించేందుకు మరోప్రయత్నంగా రైస్ బకెట్ లాంటిరూపాల్లోకి మార్చారు. కొంతమేరకూ అదీ పర్లేదు. కానీ బియ్యం ఇవ్వదలచుకుంటే మళ్ళీ వాళ్ళది మనదీ ఫోటో పెట్టుకోవాలా? ఏమో నాకెందుకో వాళ్ళని తీసుకునే చేయి చేసి మనగోడమీదకు ఈడ్చటం నామట్టుకు నాకు నచ్చలేదు. ఇలాంటివి పోటీకోసమో, ఫోటో కోసమో కాదు. అవసరం మేరకూ, అవకాశం మేరకూ చేసుకుంటూ వెళ్ళాల్సినవి కదా అనిపిస్తోంది. ఆటలాగానో, ప్రీపబ్లిసిటీ లాగానో మంచిపనులు చేయించకపోతే ఎలా అని రూపకర్తలు కోపగించవచ్చుగాక, ఈ తాటాకు మంటల మంచిపనుల వెలుతురుమీద నాకేమీ శాశ్వతనమ్మకం లేదనే చెపుతాను మంకుపిల్లాడిలా నేను ఎప్పటిలాగానే.

♫♫♪♪ బుక్ కల్చర్ పోయి,లుక్ కల్చర్ పెరిగిన రోజుల్లో మనల్ని ప్రభావితం చేసిన ఓ పది పుస్తకాలను తలచుకుంటే మంచిదేగా అనే కాన్సప్టాట ఒకటి గౌరవనీయులైన నా మంచిమంచి మిత్రులని ఉర్రూతలూగిస్తోంది సంతోషమే. అక్షరాలతో బ్రతుకుతున్న మనకి ఆధారాన్నిచ్చిన పుస్తకాలను వెనక్కితిరిగి చూసుకోవడం కొంచె ఎమోషనల్ కొంచెం నాష్టాల్జిక్ ఫీలింగ్ కూడా కావచ్చు. కానీ నాకెందుకో మహేష్ కత్తి,లాంటి మిత్రులు అప్పట్లో చదువుతున్న పుస్తకం అని కవర్ పెట్టి చదివిన తర్వాత అందులో సారాంశాన్ని తమని హత్తుకున్న విషయాలనీ పంచుకోవడం భలే నచ్చేది. అనీల్ బత్తుల లాంటి వాళ్ళు సోవియట్ పుస్తకాలను కొందరు శతకాల సంపదను పోగేస్తూ మిత్రులతో పంచుకోవాలనే ప్రయత్నాలు మరీబాగా నచ్చుతున్నాయి. నన్ను ప్రభావితం చేసిన పుస్తకాలను గురించి మిత్రులతో పంచుకోవడం బావుంటుందేమో కానీ మీరు ఖో ఇచ్చారు కాబట్టి పరుగెత్తాల్సిన ఆటలో గబగబా నాలుగు పుస్తకాలు నెత్తినెత్తుకోని పరిగెత్తేంత రడీగా లేకపోవడం నా నెమ్మదే కావచ్చు. ఈ ఆటలో నావీపుమీద మీరు బాదటం నేను మరో వీపు వెతుక్కోవడం ఎందుకో ప్రశాంతతని పరుగెత్తిస్తున్నట్లుంది.

◙¶మనీ సర్క్యులేటింగ్ బిజినెస్సుల్లాగా, మినీ ఎంటర్ టైన్ మెంట్ షోల్లాగా తయారు చేయందే మంచి పనులు చేయలేమని ఈ ప్రొగ్రాం తయారీ దార్లంతా ఫిక్సవుతున్నారంటే లోపం వాళ్ళలోనా, మనలోనా...

►► అమిగ్డాలాలమీద తప్ప, థలామస్ ఆదీనంలో పనిచేసే తలలు తయారయ్యే అవకాశం లేదని నమ్మమంటే నాకెందుకో ఆశచావక లేదు నేనూ మా మిత్రులూ మా అంతట మేమే ఆలోచించగలం అని ఆన్సర్ చెప్పాలనిపిస్తుంది.

క్లీన్ ప్లేట్ సొసైటీలో సభ్యులుగా కావాలన్నా,
నాలుగక్షరాల ఆలోచనల పేకమేడలను పటిష్టంగా కట్టాలన్నా
స్వంత వెన్నెముకమీదనే శరీర సౌధాన్ని నిలబెట్టాలన్నా

మాకేమీ ఆటల తాయిలాలు అఖ్ఖరలేదని మీ అందరి తరపునా నాకే చెప్పాలనిపిస్తోంది.

మీరు కోప్పడతారేమో కానీ .........  

_/|\_

Post by Katta Srinivas.