ఎవరు వికారి?

నీకు ఈ పేరు పెట్టిన బికారీ ఎవరో?

ఆకారానిదేముంది ఐదేళ్లు పాలించే నాయకులనిచ్చెది నువ్వే.
గతం కంటే మరో మెట్టు ఎక్కించేదీ నువ్వే.

మూణ్ణెళ్ల క్రిందటే గ్రెగోరియన్ పిన్నమ్మ పుట్టినరోజుని మోజుగా చేసుకున్న మాకు, వేపపూత వెరైటీ డిష్ మాత్రమే.
కోయిలమ్మ కూత నాస్టాల్జియా మాత్రమే
లాభాలు రావట్లేదని మామిడితోటలన్నీ నరికేసి రియల్ ఎస్టేట్స్ చేస్తున్నాం.
ఋతులన్నీ వికారులై రికామీగా తిరుగుతున్నాయి.

పరీక్షలైపోయాయిగా రంగులు చల్లేందుకు సిద్దమై చూస్తోంది వెండితెర.
ఆవు వ్యాసం తెలిసిన బుల్లితెర నీ పేరుమీద అదే చెత్త మళ్లీ మళ్లీ చూపుతోంది.

తేటగా లేని తెలివి పాలిష్ చేసి చూపించే సోషల్ మీడియా తెడ్డెం అంటేనే పెద్దపీట వేస్తోంది.
అసలే ఉక్రోశాలు, ఉద్వేగాలు, అభిజాత్యాలు అల్లర్లతో గందరగోళంగా ఉన్న సామాజిక మాధ్యమం మరింత వికారంగా మారకుండా చూస్తావుగా!!
చూస్తుంటావుగా!!
అంతేగా
అంతేగా

అందరిలాగానే మిత్రులందరికీ మరోసారి నూతన సంవత్సర శుభాకాంక్షలు.