పదునెక్కిన నీటిచుక్క

చిన్న విత్తనం
విశాల సామ్రాజ్యపు పునాదుల్లో
బీటలు తేగలదు,

చిట్టి చీమ
పడగలిప్పి బుసకొట్టే పామును
చుట్టుముట్టి మట్టుపెట్ట గలదు,

కన్నీటి చుక్కని
వ్రుధాగా రాల్చకు
తనతో చాలా పనుంది.
లకుముకి పిట్టా
ఉబికివచ్చే ఉక్రోషాన్ని
అదిమిపెట్టు.

బాణం ఎంతలాగితే అంత బలం పెరుగుతుంది.
పిడికిలి సరిగా బిగిస్తేనే దెబ్బకుదురుతుంది.
గాబరాపడి దానిని
గాలిలో ఆవిరి కానివ్వకు
పనిలో పదిలంగా ఇంకిపోనివ్వు
వరదై పరుగు పెడుతుంది.