రాజ్య విస్తరణ కాంక్ష

|| రాజ్య విస్తరణ కాంక్ష || కట్టా శ్రీనివాస్

అది
మన నరనరాల్లో
జన్యువుల్లో నిద్రపోతూనే ఉందేమో.

౿
నాదంటూ
ఒకటి బిందువుగా మొదలవగానే
నిద్ర లేస్తుంది.


౾
తనపేరుతో మెలితిరుగుతూ
పనలెత్తాలని
పరిగెత్తాలని
ప్రవర్ధిల్లాలని
కుత కుత లాడుతుంది.


◆
యుద్ధం
Nothing is unfair
పాఠం మొదలేస్తుంది.
Live and let live అంచునుంచి
చంపుడు మెట్ల సంతోషపు ఆటవుతుంది
అగత్యం లేని మలుపుల్లోకి జారుతుంది.

●
నేలమీద నడిచే మనిషి
గుర్రపు స్వారీ బోరు కొట్టి
పులి మీదకెక్కాక
అదొక కిక్కుగా తల కెక్కాక
దిగటమా?
............ ఇంకెక్కడ?

★
సమయం లేదు మిత్రమా
రణమా! శరణమా!!
ప్రేమ తడి లేదు మిత్రమా.
పరుగా! పడిపోవడమా!!

■
తనని తాను కోల్పోయాక...
అసలు తనంటూ మిగలక పోయాక...
ఉగ్గబట్టిన
యుద్ధం జరుగుతూనే ఉంటుంది.
కారణం ఒక్కటే
అదొక్కటే...