కట్టా శ్రీనివాస్ || త్వమేవహం ||

కట్టా శ్రీనివాస్ || త్వమేవహం   ||

నిజంగా
నాకప్పుడు తెలియదు.
ఒక పుట్టుక కోసం
సృష్టి ఎదురుచూస్తూ ఉందని.
కొందరికెప్పటికీ తెలీదు.

◆
సమాజ మహాయంత్రం లోనైనా
అతిచిన్న నట్టూ ముఖ్యమే,
దానికంటూ ఒక పనుంటుంది.
ఆదింకెవరూ చేయలేనిది.

౻
మనమూ అంతే
వ్యక్తులం

●
శాశ్వత అస్తమయాలు లేనట్లే
నిరర్ధక ఉదయాలూ ఉండవు.

౸
గ్లోబు నిండారా ప్రాణికోటి
చిన్న  ఉషోదయం కోసం
చీకటికళ్ళతో వేచి చూస్తున్నాయని
తూరుపుకొండల కడుపులో
ఎదిగే ఎర్రటి ముద్దకు తెలీదేమో!

*^
దేహపు నౌక నడవడానికే ఇంధనం !!
ఇంధనాన్ని తాపటానికే
బండి కొంటోంది ఎవరర్రా?


........
తేదీ : జూనొకటి ఇరవైయ్యిరవై
ప్రాచ్య పాత వాచకం
నూతనాశ్వాసం
కవిసంగమం లో ప్రచురితం