Wednesday, 14 November 2018

రాస్తున్నానేమిటి?

లోకమంతా నిస్సారంగా
కనిపిస్తోంది ఏమిటి?
బహుశా నేనే
రుచిని
కోల్పోయివుంటాను.

కళావిహీనంగా వుందేమిటి?
మనసు అద్దం
రంగులు వెలిసిపోయింటాయి.

కవిత్వం మనిషిని మృదువుగా మారుస్తుందా?



 యశస్వి సతీష్ గారి పరాం ప్రేయసీ పుస్తకంపై లేఖా రూప స్పందన ఇది


కవిత్వం మనిషిని మృదువుగా మారుస్తుందా?

సోదరా యశస్వీ మీ పరాం ప్రేయసీ చదివిన తర్వాత మూడు సందేహాలతో ఈ ఉత్తరం రాస్తున్నాను.
ఒకటి అంతా ఆన్ లైన్ అయిపోయిన తర్వాత పోస్టు డబ్బాలే కనిపించని రోజుల్లో ఇంకా ఉత్తారాలను చదివే వారు వుంటారా? రెండు నిజంగా మనతోనే వున్న మన సహచరిని ఇంతాలా ప్రేమించడం ప్రేమించారు పో కేవలం మనసులో దాచుకోకుండా బహిరంగంగా వ్యక్తం చేయడం సాధ్యమా? మూడోది చివర్లో చెపుతాను.
అనేక సందర్భాలలో కలిసి ప్రయాణం చేసిన వాళ్లం మీ వ్యక్తగత జీవితాన్నీ, రచనా ప్రస్తానాన్నీ, సామాజిక తపననూ గమనిస్తున్నవాడిని ఇదే పుస్తకం పేరు దగ్గరనుంచి పుస్తకం రూపు ఎలా వుండాలన్న దానివరకూ నిరంతరం ప్రశ్నలతో విసిగిస్తున్నవాడిని కొన్ని మాటలు పంచుకోకపోతే ఎలా మరి?
అప్పుడెప్పుడో రెండో శతాబ్దంలో నాగార్జునుడు తన మిత్రుడు యజ్ఞశ్రీకి రాసిన ‘‘సుహృల్లేఖ’’ కంటే ముందు ఏదన్నా లేఖలున్నా లేఖా సాహిత్యం వుందా? లేఖలో సాహిత్య సాంస్కృతిక గౌరవాన్ని కలిగే స్థాయి వుంటేనే వాటిని లేఖా సాహిత్యం అంటారట కదా. లేఖలకేం కరువు పావురాలు, పిట్టలూ వేగులూ వాటిని తెగచేరవేసే వారట కూడనూ. వాస్తవమైన వ్యక్తుల మధ్యనే అఖ్కర్లేదు ఊహాత్మక వ్యక్తుల మధ్య సంభాషణ ఇలా లేఖల రూపంలో జరిగినా దానికా ఔన్నత్యం వుంటే లేఖా సాహిత్యం సరసన కూర్చుంటుంది కదా. అభిజ్ఞాన శాకుంతలం, సూరన గారి ప్రభావతీ ప్రధ్యుమ్నమూ కాల్పనిక సాహిత్యంలో లేఖలను భలేగా వాడుకున్నారు కూడా. గుడిపాటి వెంకటాచలం ప్రేమలేఖలు, కనపర్తి వరలక్ష్మమ్మగారి శారదలేఖలు, కాటూరి వెంకటేశ్వరావుగారు తెలుగులోకి అనువదించిన నెహ్రూ లేఖలు, పురాణ రాఘవ శాస్త్రి గారు తెలుగీకరించిన శరత్ చంద్ర చటర్జీ లేఖలు మన లేఖా సాహిత్యాన్ని సుసంపన్నం చేసినవే కానీ వాటికీ మీ లేఖలకూ తేడాలు కూడా వున్నాయి. వాళ్లలో ఎవరూ సహచరిని యథాతధంగా ప్రేమిస్తూ జ్ఞాపకానికి కాక వ్యక్తికే రాసిన వారు కాదు. అందుకే నాకు ఇన్ని ఆశ్చర్యాలు. మెన్ననే మీరు పంపిన భోయి భీమన్న గారి జానపదుని జాబులు అక్కడక్కడా చదివి పోతగాని గారికి అందజేసాను. తిరుపతి వెంకట కవులూ, త్రిపురనేని గోపీ చంద్ లేఖలను సాహిత్యంగా మలచిన వారే కానీ ఆ లేఖలను అందజేసే పోస్టు మ్యాన్ కు రాసిన ఉత్తరం మన గుండెల్లో మోగించే తిలక్ రాసింది కూడా ఉత్తరమే కదా. కందుకూరి వీరేశలింగం మొదలు గురజాడ, ఆరుద్ర, కొడవటిగంటి, కె.వి. రమణారెడ్డి, బంగోరె, తదితరులెందరో లేఖా సాహిత్యానికి వన్నెలద్దారు సరే ఇదంతా చెపుతున్నాను కానీ ఈ లేఖా సాహిత్యం పై పరిశోధనలతో పి హెచ్ డీ చేసిన మలశ్రీ గారు మా ప్రాంత వాసే కదా.  మాటల మధ్యలో సిపి బ్రౌన్ ని తలచుకోకుండా ఎలా? బ్రౌన్ లేఖలు-ఆధునికాంధ్ర సాహిత్య చరిత్ర శకలాలు పేరుతో ఎన్నెన్ని ముచ్చట్లు తెలుగు నేల తెలుగు భాష గొప్పతనాన్ని చెప్పాయి. కావచ్చు కానీ ఆయా లేఖా సాహిత్యాలకూ మీ లేఖలకూ మధ్య తేడాలు కూడా కనిపిస్తున్నాయి. చూస్తే అదేదో విస్తృత జనబహుళ్యానికి మహా ప్రయోజనం కోసం అన్నట్లుగా కాక పైపైన మీతో వున్న మీ సహచరి కి మాత్రమే రాసినట్లున్న లేఖలు లోపటి ప్రపంచాన్ని ఎక్కడా వదలకుండా ఎలా తడమగలిగాయి అసలు?

Tuesday, 6 November 2018

కట్టా శ్రీనివాస్ || 🎊 వెలుతురుల వరుస 🎊 ||

మట్టి ప్రమిదకు కూడా
గట్టి ప్యాకింగుల జాడ్యం అంటుకున్నాక
పల్లె సారె పై నవ్వు ఎలా పూస్తుంది?

వెలుతురుల ప్రమత్తతకు
విషాలు నిలువెల్లా అద్దుకున్నప్పుడు
కొవ్వు లేకుండా వత్తులెలా వెలుగుతాయి?

డజన్ల అంతస్థుల షాపింగ్ మాల్స్
ఇనుపపాదాలతో వీధికొట్లను తొక్కుకుంటూ పోతున్నాయి.

సెజ్ లలో పండించిన పూలు కంటైనర్లలో ఇంటిముందుగా ఊపుకుంటూ వెళ్తున్నప్పుడు ఉన్న ఒక్క పూలకుండీ భళ్ళున మిగిలిపోయింది.

డాల్బీ డబ్బా పడి డప్పు చితికిపోయింది.
కార్పెట్ల సరసన చాప వెలిసిపోయింది.
పెట్రోలు ప్రవాహలు కండరాల బలం లాగేసుకున్నాయి.

స్వతంత్రత స్ఫూర్తిని నింపి ఒక చిన్న దీపం వెలిగిద్దాం పట్టు. వలలా పరచుకునే చీకటి కొంచెమైనా పోతుందేమో చూద్దాం.
దొరల్లాంటి దొంగలు ఊళ్ళు పంచుకునే వేళ నిజాలను డాం డాం అని పేలుద్దాం పట్టు, దోపిడీని పరిగెత్తించే ఎరుక నిద్రలేస్తుందేమో చూద్దాం.

తేదీ 06౼11౼2018 (నరక చతుర్దశి నాటి రాత్రి )

Sunday, 21 October 2018

కట్టా శ్రీనివాస్ || తడిలేని పాదు ||

కట్టా శ్రీనివాస్ || తడిలేని పాదు ||


జనాలతో కలిసేదారిలో
కరుకుముళ్ళు రాఁక్కు పోతున్ననోప్పి.
పదునెక్కిన దృక్పధాలు
గిడసబారిన మనసులు
తుప్పుపట్టిన భావాలు
కలివిడిగా వుండేలోగానే కలుక్కుమనిపిస్తున్న నొప్పి.

గుచ్చుకుంటున్నందుకు కాదు
మెత్తగా మార్చలేకపోతున్నందుకు
నొప్పి.
మెత్తబరిచే తడి ఊటే లేనందుకు నొప్పి.
మెత్తబడితే పదునులోకంలో బతకలేమనే ముళ్లపొదలు ఏపుగా పెరిగినందుకు నొప్పి.
గిడసబరిచే కేంద్రాలు లాభాల్లో తేలుతున్నందుకు నొప్పి.
బండలను ఢీ అంటూ పగలగొట్టే
గుండెల్లో సన్న ఊట చెలిమైనాలేనందుకు నొప్పి.
ఊట అనవసరం అనేదే పెద్ద పాఠం అయినందుకు నొప్పు.
ఇంతకంటే ఏమీ చెప్పలేనందుకు....

తేదీ: 21-09-2018


Friday, 19 October 2018

భక్తి ఉద్యమంలో పెనుమార్పులకు తెరతీసిన త్రిమతాచార్యులు

హైందవమతంలో కర్మకాండకు, కుల వ్యవస్థకు వ్యతిరేకంగా ఉద్భవించిన జైన, బౌద్ధమతాలు మధ్యయుగ ఆరంభంలో ప్రాచుర్యాన్ని కోల్పోయాయి. జైన, బౌద్ధాలలోని నిరాడంబరత, కులరాహిత్యం, సమానత్వ ధోరణులు హిందూ సంస్కర్తలను ఆకర్శించాయి. ఫలితంగా ఉపనిషత్తులు పేర్కొన్న జ్ఞాన, భక్తి మార్గాలకు ప్రాధాన్యం పెరిగింది. త్రిమతాచార్యుల రాకతో హైందవమతంలో నూతన ధోరణులు ప్రవేశించాయి.
 

శంకరాచార్యులు (క్రీ.శ. 788-820)


సిద్ధాంతం : అద్వైతం
జన్మస్థానం : కేరళలోని కాలడి
జననం: క్రీ.శ.788
బిరుదు: ప్రచ్ఛన్న బుద్ధుడు
మరణం: క్రీ.శ. 820
మరణస్థలం: కేదారినాథ్
ఇతనిని ఆదిగురువుగా భావించి ఆదిశంకరాచార్యులుగా పిలుస్తారు.
పూర్వమీమాంస భాష్యకారుడైన కుమారిలభట్టు శిష్యుడైన మండనమిసున్ని వాదనలో ఓడించాడు. 
మాయా సిద్ధాంతాన్ని ప్రవేశపెట్టి ప్రచ్ఛన్న బుద్ధుడిగా ప్రసిద్ధి చెందాడు.
శంకరుడు ప్రతిపాదించిన అద్వైతానికి మూలం బాదరాయణుడు రచించిన ఉత్తర మీమాంస (బ్రహ్మ సూత్రాలు).
శంకరుడు బాదరాయణ బ్రహ్మసూత్రాలకు భాష్యం రచించాడు.
బ్రహ్మమే సత్యం, శాశ్వతం అని బోధించాడు.
జగత్తు వాస్తవం కాదు, కేవలం మిథ్య(మిథ్యావాదం) ప్రతిపాదించాడు.
చాందోగ్యోపనిషత్‌లోని తత్వమసి (బ్మహ్మవునీవు) అనేది అద్వైత సిద్ధాంతానికి మూలం.
శృంగేరి (కర్ణాటక), ద్వారక (గుజరాత్), బద్రీనాథ్ (ఉత్తరాఖండ్), పూరీ (ఒడిశా) క్షేత్రాలలో నాలుగు మఠాలు స్థాపించాడు.
శంకరాచార్యుల మరణానంతరం ఇతని శిష్యులు కంచి(తమిళనాడు) మఠాన్ని స్థాపించారు.
ప్రస్థానత్రయంగా గౌరవించే బ్రహ్మసూత్రాలు, ఉపనిషత్తులు, భగవద్గీతలకు వ్యాఖ్యానం రాశాడు.
ఇతని బోధనలను అనుసరించే వారిని స్మార్థులు అంటారు.

రామానుజాచార్యులు ( 1017-1137)


సిద్ధాంతం : విశిష్టాద్వైతం
జన్మస్థానం: శ్రీపెరంబుదూర్
గ్రంథాలు: వేదాంతసారం
వేదాంత సంగ్రహం
వేదాంత దీపం
గీతాభాష్యం
శ్రీభాష్యం
బ్రహ్మసూత్రాలకు శ్రీభాష్యం పేరిట వ్యాఖ్యానం రాశాడు. 
కులోత్తుంగ చోళుని ఆగ్రహానికి గురై హొయసాల రాజ్యానికి చేరుకున్నాడు.
శంకరుని మాయావాదాన్ని తిరస్కరించాడు.
జ్ఞానమార్గంతోపాటు భక్తి, కర్మ మార్గాలను కూడా ప్రతిపాదించాడు.
శ్రీవైష్ణవం అనే తెగను స్థాపించాడు.
120 ఏండ్లు జీవించాడు. ప్రస్థాన త్రయానికి వ్యాఖ్యానం రాశాడు.
తన గురువు యమునముని తర్వాత శ్రీరంగం పీఠాధిపతిగా కొనసాగాడు.
విశిష్టాద్వైతంలో తెలకలి, వడుకలై అనే శాఖలు ఉన్నాయి.
మహారాష్ట్రలోని పండరీపూర్‌లో గల విఠోభా ఆలయాన్ని ఆధారంగా చేసుకొని భక్తి ఉద్యమాన్ని అధికంగా వ్యాప్తిజేశాడు.

మద్వాచార్యులు (క్రీశ 13వ శతాబ్దం)


సిద్ధాంతం : ద్వైతం
జన్మస్థానం: కర్ణాటకలోని ఫాకజ
గ్రంథాలు : అనువ్యాఖ్యానం
: అనుభాష్యం
: బ్రహ్మసూత్ర భాష్యం
తొలిపేరు వాసుదేవుడు తర్వాత ఆనందతీర్థుడు, పూర్ణప్రజ్ఞుడు, మద్వాచార్యుడు అనే పేర్లతో ప్రసిద్ధికెక్కాడు.
ఉడిపిలో శ్రీకృష్ణ ఆలయాన్ని నిర్మించాడు.
ఇతను 37 గ్రంథాలు రాశాడు. వాటిల్లో ముఖ్యమైంది బ్రహ్మసూత్ర భాష్యం
చాందోగ్య, ఐతరేయ, బృహదారణ్యక మొదలైన ఉపనిషత్తులకు భాష్యాలు రాశాడు.
ఇతని అనుయాయులను మధ్య వైష్ణవులు అని అంటారు. అద్వైతాన్ని వ్యతిరేకించాడు. 
మతభేదాలను, వర్ణధర్మాలను సమర్థించాడు.
ఈ మతాన్ని కన్నడ బ్రాహ్మణులు మాత్రమే స్వీకరించారు. 
మద్వాచార్యుని ప్రభావంతో కర్ణాటకలో దాసకూట ఉద్యమం ప్రారంభమైంది. దాసకూటం అంటే భగవంతుని సేవకులు అని అర్థం. ఈ ఉద్యమమే మహారాష్ట్రలో పండరీపుర ఉద్యమమైంది.

Sunday, 14 October 2018

ఒక మనిషి పోయిన వందేళ్ల తర్వాత మళ్ళీ ఒకసారి తలచుకుందాం.

ఒక మనిషి పోయిన వందేళ్ల తర్వాత మళ్ళీ ఒకసారి తలచుకుందాం.

అక్టోబర్ 15వ తారీఖు 1918 నుండి 2018 నాటి అక్టోబర్ 15 కు అంతే కదా అచ్చంగా వంద ఏళ్ళు గడిచాయి.

మహారాష్ట్ర లో ఆయన నడిచిన ప్రాంతంలో తిరుగుతూ ఆయన వాడిన వస్తువులు చూస్తుంటే అనేక ఆలోచనలు సుడితిరుగాడుతున్నాయి.

1857లో ఝాన్సీ రాణి వెంటనడిచిన సేనలో ఒకడిగా పోరాట మార్గంలో ఉంటే ఏమి చేసేవాడో ఎంత పేరు వచ్చేదో తెలియదు. అసలా తొలి పోరాటంలో ఈయన ఉన్నాడనే ఆధారపు దారం ముక్కఏదీ మిగలలేదు కదా.

సాము గారిడీలకు కుస్తీ పోటీలకు గొప్ప పేరున్న షిరిడీ ప్రాంతంలో మోహిద్దీన్ తంబోలి చేతిలో ఈయన ఒడిపోకపోయివుంటే ఎలా ఉండేదో? పేరున్న మల్లయుద్ద యోధుడు అయ్యేవారా? షావోలిన్ లా గొప్ప యుద్ధ శిక్షణా కేంద్రం పెట్టేవారా? ఓటమి తర్వాత ఏదో నైరాశ్యం వేషధారణ లోనూ మార్పు తెచ్చింది మోకాళ్ళ వరకు వుండే ముస్లిం కఫని, తలకు ఒక తలగుడ్డ ఎక్కడో ఆలోచిస్తూ తిరిగాడు ఈయన. పేరు హరి బావు భూసారి అట, పుట్టింది మహారాష్ట్రలోని అహ్మద్ నగర్ జిల్లాలో కానీ అందరికి గుర్తున్న విషయాలు అవేమీ కానంతగా మరో గొప్ప కోణంలో ఎదిగాడు ఈయన. అక్కడినుంచి మిగిలిన కధ అంతా తెలుగు వాళ్ళు అందరికీ తెలిసిందే. ఎందుకంటే ఆయనను సాయి అని తండ్రిగా భావిస్తూ సాయి బాబా అని వేరే సాయి లతో బాబాలతో కలిసి పోకుండా ఆయన పెరిగిన ఊరుకూడా కలిపి షిరిడీ సాయి బాబా అని పిలుస్తుంటారు కాబట్టి. కాకపోతే దైవ సమానుడి హోదా నుంచి దేవుడి స్థాయిలో చూడటం మొదలయ్యాక ఆయన మనిషే నంటే కూడా నమ్మానంత అభిమానం మహారాష్ట్ర తర్వాత అంతకు మించిన స్థాయిలో తెలుగు నేల మీద ప్రభావం సంతరించుకుంది. ఒక మనిషి తన జీవిత కాలంలో ఏం పని చేస్తే ప్రజలు ఇంత గుర్తుపెట్టుకుంటారు? స్వతంత్ర పోరాటాలు, విజ్ఞాన ఆవిష్కరణలు, గొప్ప సూత్రీకరణలు, కవితలు, రచనలు, తత్వం ఇంకా ఆఖరుకు ఆశయం కోసం ఆత్మ బలిదానాలు వీటన్నింటికంటే మించి ఒక మనిషి ఇంతలా ఎలా గుర్తుంటాడు? మహిమలు, సేవ, బోధనకు మన భారతీయ జీవన విధానంలో వుండే ప్రాముఖ్యత మాత్రమే కారణమా? ఏమో ఈరోజు సాయి మ్యూజియం లో ఆయన వాడిన వస్తువులు వగైరా చూస్తున్నప్పుడు ఆశ్చర్యంగా అనిపించింది.

వెంకోసా అనే గురువు దగ్గర 12 ఏళ్ల శిష్యరికంలో ఏం నేర్చుకున్నారో?

మహాల్సాపతి, అప్పా జోగలే, కాశీనాధ వంటి వాళ్ళు వేపచెట్టు క్రింద ఎవరినీ పట్టనట్లు నిరంతరం ధ్యానంలో కూర్చునే యువకుడిలో ఏమి గమనించి ఆకర్షితులయ్యారో?

 1858 లొనే ఒకరోజు అసలు చాంద్ పాటిల్ కుటుంబపు పెళ్లి వేడుకలో ఒకడిగా వచ్చి ఖండోబా దగ్గర బండి దిగినప్పుడే మహల్సావతి ఆవో సాయి అని ఎందుకు పిలిచాడో? లేదా ఇదంతా తర్వాతి కధనమేనా?

1858 నుంచి 1918 వరకు ఒక పాత మసీదును ఆశ్రయంగా తీసుకుని దానికే ద్వారాకామాయి గా పేరుపెట్టుకుని గడిపిన ఈయన జీవితంలో ప్రత్యేకత ఏమిటి?

ఈయన చనిపోవడానికి పదేళ్ల ముందు నుంచే అంటే 1910 నుంచే సాయి బాబా గా పేరు మారుమ్రోగిపోయింది. మహాల్సాపతి , హేమాండ్ పంతు, శ్యామా, దాసగణు, హరి సీతారాం దీక్షిత్ (కాకాదీక్షిత్), రఘువీర్ పురందరే, హరి వినాయక్ సాఠే, నానా సాహెబ్ చందోర్కర్, బల్వంత్ నాచ్నే, దామోదర్ రాస్నే, మోరేశ్వర్ ప్రధాన్, నార్కే, ఖాపర్దే, కర్టిస్, రావు బహద్దూర్ ధూమల్, నానా సాహెబ్ నిమోన్కర్, అబ్దుల్, లక్ష్మీబాయి షిండే, బయ్యాజీ అప్పాజీ పాటిల్, కాశీరాం షింపీ, కొండాజీ,గాబాజీ,తుకారాం , శ్రీమతి చంద్రాబాయి బోర్కర్, శ్రీమతి తార్కాడ్, రేగే, రాధాకృష్ణ ఆయీ, కృష్ణశాస్త్రి జగేశ్వర్ భీష్మ, సపత్నేకర్, అన్నా చించిణీకర్, చక్ర నారాయణ్, జనార్ధన్ గల్వంకర్ లతో పాటు మెహర్ బాబా ఉపాసనీ మహరాజ్ వంటి వారు బుద్ధుడి జాతక కదల్లాగా, సోక్రటీజ్ ను వెలుగులోకి తెచ్చిన ప్లేటో లాగా చేసిన నిరంతర కృషికి కారణం ఏమిటో?

1910 లో దాసుగణ అనే కళాకారుడు తన పాటలతో చేసిన ప్రచారము చిన్నది కాదు.

1916 లో సాయి బాబా జీవించి వుండగానే  గోవిందరావు రఘునాధ దభోల్కర్ (ఇతనికి సాయిబాబా ‘హేమాండ్ పంత్’ అనే పేరు పెట్టారు) మరాఠీలో వ్రాసిన ‘సాయి సచ్చరిత్ర' కూడా జనానికి సాయి తెలిసేలా చేసింది.తెలుగులో ప్రత్తి నారాయణరావు అనువదించిన ‘సాయి సచ్చరిత్ర’ తో పాటు ఆచార్య ఎక్కిరాల భరద్వాజ వ్రాసిన సాయి లీలామృతము స్మృతి శ్రీనివాస్, ఆంటోనియో రిగోపోలస్ వంటి వారు వ్రాసిన సాయిబాబా జీవిత చరిత్రలు  గణేష శ్రీకృష్ణ ఖర్పడే వ్రాసిన ‘షిరిడి దినచర్య’ వంటివి విస్తృతంగా సాయి బాబా కు ప్రాచుర్యం తెచ్చాయి. అదే ఊపులో అనేక సినిమాలు కూడా వచ్చాయి. అప్పట్లో విజయ్ చందర్ నుంచి మొన్నీమధ్య నాగార్జున వరకు తెలుగులోనూ సాయి చరిత్రను సెలెబ్రిటీ హోదాలో సేల్ చేశారు.
ఇప్పటికీ రోజుకు సగటున 20 వేల మంది, ప్రత్యేక దినాల్లో లక్షమంది ఎక్కడెక్కడినుంచో ఈ ప్రాంతానికి వస్తున్నారు. దీనివల్ల ఇదంతా? భక్తి కి కారణం కేవలం నమ్మకమేనా? నమ్మకానికి పునాది మరేదైనా ఉందా?

 యెవాలా ఆనందనాధ్ అనే హిందు సాధువు బాబను ఒక ఆధ్యాత్మ వజ్రంగా చెపితే, గంగాగిర్ అనే మరొక గొప్ప సాధువు నిజమేనన్నాడు,  బేడేకర్ మహారాజ్ 1873లో బాబాను దర్శించుకొన్నపుడు ఆయనను జగద్గురు అని సంబోధించాడు. టెంబే స్వామీజీ అనబడే వసుదేవానంద సరస్వతి కూడా బాబాను అమితంగా గౌరవించాడు.చాలా మంది శైవ సాధువులు కూడా బాబాను ఆరాధించారు.స్వామి కాళేశ్వర్ బాబాను తన దైవ సమానుడైన గురువుగా పూజించారు.

అంతేకాదు అటు పక్క సూఫీ సంప్రదాయానికి చెందిన మహమ్మదీయులు సాయిబాబాను గురువుగా నమ్మారు. మెహెర్ బాబాసాయిబాబాను కుతుబ్ ఎ ఇర్షాద్(అత్యుత్తమమైన కుతుబ్) పొగిడారు. జోరాస్ట్రియన్ మతానికి చెందిన నానీ ఫాల్కీవాలా, హోమీ భాభా వంటి ప్రముఖులు కూడా సాయిబాబాను విశ్వసించారు. నాకు నిజంగా ఆశ్చర్యం వేసింది నేను తెలిసిన వాడినే అనుకునే మతగురువు స్థాయి వాళ్ళు మళ్లీ బాబా గొప్పతనం ఒప్పుకోవడం వెనకున్న నిజం ఏమిటి? బయటకు తెలియని గొప్పతనం ఆయనలో వాళ్ళు ఏమి చూసారు?

పిచ్చి వాడిలా తిరిగాడు, రాళ్లు కూడా రువ్వించుకున్నాడు, హుక్కా తాగాడు, నవ్వాడు, ఏడ్చాడు, నిరాశకు లోనయ్యాడు, ఆవేశపడ్డాడు, తిట్టాడు, కొన్నిసార్లు కొట్టాడు, ఆయన విన్న గ్రామ ఫోన్ యంత్రం రికార్డులు, తిరగలి, కర్ర అన్ని ఇంకా అక్కడే కనిపిస్తున్నాయి. ఎలా చాలా మంది గొప్ప వాళ్ళకంటే ముందు వరుసలోకి రాగలిగాడు ఆయన?
శ్రద్ద సబూరి లాంటి బోధనలు భారతీయ తాత్వికతకి మరీ అంత కొత్తవి కాదు అయినా ఆయన వల్ల మాటలకు విలువోచ్చి0దా? విలువైన మాటలు చెప్పటం వల్ల గొప్పగా భవిస్తున్నామా? అంటే పెద్దగా ఆలోచించకుండానే మొదటిదే నిజమని ఎక్కువలో ఎక్కువమంది తప్పకుండా చెప్పేస్తారు. మరి ఆయనకు మెరుపు తెచ్చిన వెలుగు ఏమిటి? మనలో అప్పటికే ఉన్న కామన్ వెలితిని పూడ్చే పని ఏదన్నా ఆయన తెలియకుండానే చేశాడా?

ఏమో ఉదయం దర్శనం దగ్గరనుండి కొన్ని ఆలోచనలు ఇలా సుడితిరుగుతున్నాయి. ఏదో ఒక హడావిడి ముగింపు మాట ఓ నాకంత తెలిసినట్లు ఇవ్వాలని లేదు. మిత్రులుగా నా ఆలోచనలు మీతో పంచుకోవాలనిపించింది. మీరే నాకు సమాధాన పడే సమాచారం చెపుతారేమో? ఏమో మీరూ నాతో పాటు నాలా ఇలా ఆయన వైపు, అయిన లాంటి వారి వైపు చూస్తారేమో?
ఎవున్నా రెండు ముక్కలు మాట్లాడుకుందాం మరి.

మీ
కట్టా శ్రీనివాస్

Wednesday, 3 October 2018

అలిపిరి నుంచి తిరుమల నడక మార్గంలో ప్రయాణం

కట్టా శ్రీనివాస్ || అద్వైతం ||


1.
బాల్కనీలోంచి 
చెత్తబుట్టలో ఏరుకుంటున్న దీనుడిని చూస్తూ
బ్రతికిపోయాన్రా దేవుడా
చెత్తలో ఏరుకునేంతలా పలచబరచలేదు
పదిసార్లు మొక్కుతున్నారు ఒకరు.
బాల్కనీ వైపు చూస్తూ
బ్రతికించావుపో భగవంతుడా నిన్నే చెత్తలో పడేసేంతగా
నన్ను మందంగా చేయలేదు.
చేతిలోది తుడుచుకుంటూ మరొకరు.
2.
అద్దాలు మూసిన కారులోంచి
మురికి వాడ పక్కగా వెళుతూ
వ్యధా జీవితం గడపాల్సి రానందుకు
గుండెలన్నీండా గాలిపీల్చుకుని
హమ్మయా అనుకున్నారొకరు.
ఖళ్ళున దగ్గుతున్న పుళ్ళుపడిన
తాతమ్మను తుడుస్తూ
హాయిగా నిశ్వాసించారొకరు
మనసు అద్దాలు మూసుకుని
షోపీసులా బ్రతకక మనిషిలానే వున్నందుకు.
3.
అభిప్రాయం బలంగా కుదిపేసినప్పుడల్లా
దిక్కులు చూస్తున్నానిప్పుడు

Sunday, 30 September 2018

రూమి లయాత్మక తాత్విక కవిత్వం

మౌలానా జలాలుద్దీన్ బాల్ఖి రూమి మహమ్మదీయ నాగరికత యొక్క గొప్ప ఆధ్యాత్మికవాది మరియు గొప్ప తాత్విక కవి. ఆఫ్గనిస్థాన్లో అతను మౌలానా గా,ఇరాన్లో అతను మౌలావి గా ప్రసిద్ధుడు. 2007 లో యునెస్కో లో జరిగిన రూమీ 800వ జయంతి వేడుకలలో రూమీ ఆశలు, ఆశయాల గురించి అధ్యయనం చేస్తున్నఅనేకమందికి ఉత్సాహాన్ని ఇవ్వటం ద్వారా మానవుని మదిలో శాంతికాముకతని ధృడతరం చేయాలని భావించారు. నిజానికి ప్రస్తుత తాలీబాన్ సంస్కృతితో ప్రపంచానికి తుపాకీ మొనలా తయారైన ప్రస్తుతం ఆఫ్ఘనిస్తాన్ గా పిలుస్తున్న ప్రాంతంలో బాక్ట్రియా లోని బల్ఖ్ ప్రాంతంలో రూమీ పుట్టారని సాంప్రదాయక చరిత్ర చెపుతోంది. తజికిస్థాన్ లోని వఖ్ష్ ప్రాంతంలో జన్మించాడనే మరో వాదమూ వుంది. కానీ ఈయన బైజాంటియన్ సామ్రాజ్యంలోని రోమన్ ప్రాంతమైన రూమ్ లో తన జీవితకాలం ఎక్కువగా గడిపాడు కాబట్టి ఇతనికి రూమి అనే పేరు వచ్చింది. విశ్వనరులను ఈ ప్రాంతం వారని కట్టడి చేయగలమా ?

ఫేస్ బుక్

Tweets

లంకెలు