Saturday, 9 June 2018

*కాలా’ అనే ‘కరి కాలుడి’కి ఒక ఉత్తరం


కాలా ఈ ఉత్తరం నీకే...!
బాగున్నావా కాలా ? ఎందుకు బాగుండవులే ఎంతమంది నాలాంటి ప్రజలునిన్ను గుండెల్లో పెట్టుకుని చూసుకుంటున్నారు కదా, ఏదో చేస్తావని నిజంగా నమ్మి నీకోసం నిలబడుతున్నారు కదా అది చాలు నీ నవ్వుని అలాగే బ్రతికించడానికి. నాయకుడిగా నువ్వు వాళ్ళకి ఏం చేసావ్ గుండెలమీద చెయ్యేసుకుని మళ్ళీ ఒకసారి సీసాలో ద్రవం ఏదో తాగనప్పుడు ఆలోచించు సమాధానం దొరుకుతుందేమో చూద్దాం. అసలే ఎన్నికల సమయం అణగారిన వెలివాడలను కేవలం ఓట్లుగా మాత్రమైనా చూడడం వల్లనే బ్రతికున్నాయి అనుకునే రోజుల్లో వాడకట్టు నాయకుడొకడు వెండితరమీద కనిపిస్తాడట అనగానే ఎంత ఆశపడ్డమో తెలుసా? నిజంగానే తరాలు తరాలుగా ఏళ్ళూ పూళ్ళుగా గూడుకట్టుకు పోయిన పెద్ద పెద్ద సమస్యల భారం దించుకునే పరిష్కారం ఏదన్నా చెపుతావనుకున్నాం. కానీ నువ్వు చేసించేదేమిటి? పా రంజితో  తో కటీఫ్ నేను మాట్లాడను కోపం వచ్చింది అందుకే ఈ ఉత్తరం నీకంటే నీకే. కుదిరితే కొన్ని ప్రశ్నలకైనా సమాధానం ఇవ్వు కాలా ఎందుకంటే ఇదన్నా చేస్తావని ఆశపడుతున్నా. సరే కానీ కాలా అంటే ఒక రంగు కాదు. ఏం రంగూ లేని తనం కావాలంటే కాషాయ నిర్వచనం కాదు సివి రామన్ ని అడుగు.

ఒకటి......) నిన్ను వెన్నంటి వచ్చే వాడిని కాపాడాల్సిన అవసరం నీకు లేదనుకున్నావా?

Wednesday, 6 June 2018

వెండితెరపై అంతర్జాల అభిమన్యుడి గురించి

మీకు టచ్ ఫోన్ వుందా? ఎడా పెడా అప్లికేషన్లు ఇన్ స్టాల్ చేసుకుంటూ హా నాకేమి అవుతుందిలే అనుకుంటున్నారా?

మీ బ్యాంక్ అకౌంట్ ఆన్ లైన్ లో ఆపరేట్ చేస్తున్నారా? అబ్బే నేను భద్రమే సుమీ అని మురిసిపోతున్నారా?

వాడెవడో నా ఆధార్ వివరాలు కొట్టేస్టే ఏం పోతుంది నా గోచీ అని చులకనగా తీసేస్తున్నారా?

 జూన్ 1న రిలీజ్ అయిన అభిమన్యుడు (తమిళంలో ఇరంబు తిరై )ఒక్కసారి చూడండి.

Monday, 16 April 2018

1857 తిరుగుబాటు కాలం నాటి అలంబేగ్ అనే వీరుడిత్యాగాన్ని కథగా చెప్తున్న సగం పుర్రె



1857 తిరుగుబాటు కాలం నాటి అలంబేగ్ అనే వీరుడిత్యాగాన్ని కథగా చెప్తున్న సగం పుర్రె

అలంబేగ్ పుర్రె :  

1857 తిరుగుబాటు దారుని    

జీవన్మరణ వృత్తాంతం
పోయిన సంవత్సరం నవంబర్ లో ఒక పుస్తకం విడుదల అయ్యింది. అదికూడా మన దేశంలో కాదు రచయిత మన దేశం వాడు కూడా కాదు. కానీ విషయం మన దేశానికి సంభందించినదే. అప్పుడెప్పుడో సిపాయిల తిరుగుబాటు 1857 కాలం నాడు భ్రిటీష్ ఇండియాలో పనిచేసిన భారతీయ హవల్దార్ సైనికుడు అలంబేగ్ పుర్రె గురించి చాలా సంగతులు కాదు కాదు నిజాలను వెలికి తీస్తూ ఆ వీరసైనికుడికి కనీస గౌరవం దక్కాలంటే ఆ పుర్రెను ఇప్పటికైనా భారతదేశానికి పంపి అంత్యక్రియలు జరిగేలా చూడమని ఆ పుస్తక రచయిత కిమ్ వాగ్నర్ వాళ్ల దేశాన్ని డిమాండ్ చేస్తున్నారు.

ఎవరీ పరిశోధకుడు ?  కిమ్ వాగ్నర్ లండన్ లోని క్వీన్ మేరీ కళాశాలలో బ్రిటీష్ ఇంపీరియల్ చరిత్ర పాఠ్యాంశాల అధ్యాపకుడిగా పనిచేస్తున్నారు. తన పాఠ్యాంశాలకు అదనంగా బ్రిటీష్ ఇంపిరియల్ భారతదేశంలో చేసిన ప్రస్థానం గురించి అప్పుడు జరిగిన వివిధ చారిత్రక సంఘటనల లోతుపాతులను గురించి అధ్యయనం కూడా చేస్తున్నారు.


పరిశోధన మధ్యలో చేరిన పుర్రె  : వాగ్నర్ పరిశోధనలు జరుగుతున్న నేపద్యంలోనే 2014 సంవత్సరంలో ఒకనాడు ఆయనకు ఒక మెయిల్ వచ్చింది. అది పంపింది ఒక Lord Clyde ( pub in the eastern English coastal town of Walmer in Kent ) అనే ఒక పబ్ ను కొత్తగా కొనుగోలు చేసిన జంట నుంచి వారి మెయిల్ సారాంశం ఏమిటంటే అయ్యా మా హోటల్ స్టోర్ రూం లో ఒక పుర్రె వుంది. మాకు దానిని ఏం చేయాలో తెలియట్లేదు మీరు చరిత్ర పరిశోధకులు కదా మీకు ఏమైనా ఉపయోగపడితే దాన్ని తీసుకెళ్ళండి అని. పైగా మరో విషయం కూడా చెప్పారు ఆ పుర్రె కంటి రంధ్రం లోపట చేతితో రాసిన ఒక కాగితం కూడా వుంది దానిలో ఏవో వివరాలు వున్నాయి అని చెప్పారు. వాగ్నర్ వెంటనే ఆ పుర్రెను పరిశీలించేందుకు వెళ్లాడు. చాలా పాత పుర్రె క్రింది దవడ మొత్తం ఎక్కడో పోయింది. పై దవడలోని కొన్ని పళ్ళు కూడా శిధిలం అయిపోయాయి.  మామూలుగా అయితే దానికేం ప్రత్యేకత ఉండేది కాదు. కానీ దాని కంటి రంధ్రంలో ఆ పుర్రెకు సంభందించిన కొన్ని వివరాలు రాయడం వల్ల అది కూడా చరిత్ర పరిశోధకుడికి దొరకటం వల్ల చరిత్రలో మరుగున పడిపోయిన అనేక నిజాలు హఠాత్తుగా వెలుగులోకి వచ్చాయి. ఆ చేతిరాతతో వున్న కాగితంలో ఇలా వుంది.

Saturday, 14 April 2018

కట్టా శ్రీనివాస్ || ప్రపంచానికి ఆఖరి ఘడియలు ||

తెగ బలిసిన ముల్లు
ఎగబడి ఎగబడి మరీ
పసిమొగ్గను గుచ్చుతోంది.
రాలిపోతున్న పసరుగాయకోసమే కాదు జనులారా
మనుగడే మిగలక కుదుళ్ళతో సహా మశానం అవ్వబోయే చెట్టుకోసం కూడా ఏడవండి.
ఏడవండి రక్తం కన్నీరై వచ్చేంత వరకు ఏడవండి.

అణుబాంబులు క్రిమి బాంబులు ప్రమాదమని అంతర్జాతీయ ఒప్పందాలు చేసుకుంటున్న పెద్దలారా!!
ప్రపంచాన్ని ముంచేసే ఉపద్రవమై ప్రవహిస్తున్న టెస్టోస్టిరోన్ నియంత్రణ చర్యలేం చేశారురా?

కంచెలు కూడా చేలపై ఎగబడి గునపాలను దింపుతున్నాయి.
సమాజమే పాముగా మారి కళ్ళు మూసుకుపోయి స్వంత పిల్లల్ని గుటుక్కున మింగేస్తోంది.
ప్రళయం ఎక్కడినుంచి వస్తుందో అని పెద్ద పెద్ద దుర్భిణీలలో చూసే గుడ్డి నాయాల్లారా!
బయటికి కాదు ఒక్కసారి లోపటికి చూడండి.

గిరగిరా తిరుగుతున్న భూమి దారం పుటుక్కున తెగిపోయినట్లు
ఇన్నాళ్లు భద్రమని నిలబడ్డ కళ్ళక్రింద భూమి పూసుక్కున జరిపోయినట్లు తెల్లారాక కూడా ఒకటే పీడకలలు.
ఉరే సచ్చిపోయిన సిగ్మాన్డు ఫ్రాయిడు దీనికసలు అర్ధం చెప్పి బతికించరా సామీ.

వాడు నూరుకున్న కత్తి వాడి గొంతులోని దింపుకుంటున్నాడు శాడిజం అంటారే అది మసోకిజం. ఎక్కడో రెడ్ చిప్ ఆక్టివేట్ అయ్యింది సమాజం సెల్ఫ్ డిస్ట్రోయ్ దిశగా  పిచ్చిపట్టి పూనకం రేగినట్లు ఊగుతూ పరిగెడుతోంది.

ముగిస్తున్న వాక్యం చివర ముగింపులేని ఆలోచనలు ఊట చలమలై అలమటిస్తున్నాయి.
మిత్రమా బ్రేక్ లు రెగ్యులేటర్లు ఎక్కడున్నాయో చూడు అసలు తయారు చేసారో లేదో తెలుసుకో.
ఆ కనబడే అంచునుండి మొత్తం పడిపోకముందే ఆపగలమేమో ప్రయత్నం చేద్దాం.

తేది : 14-04-2018

Friday, 13 April 2018

దుమ్మురేపుతున్న రాయలసీమ జానపద గీతం గురించి మరికొన్ని విశేషాలు



పాపులర్ మాధ్యమంలో జానపదాల జోరు ఈ మధ్య సంతోషాన్ని కలిగించే విషయం. రంగస్థలం సినిమాలో ఎంత చక్కంగున్నావే లచ్చిమి అంటూ లచ్చిమిని పొగిడినా ఎంతచక్కంగున్నావే గీతమా ఎంత హత్తుకున్నావే అంటూ ప్రేక్షకులు అక్కున చేర్చుకున్నారు. అంతకు ముందు ఫిదాలో వచ్చిండే మెల్లా మెల్లగ వచ్చిండే అంటూ తెలంగాణా యాసను సంస్కృతినీ అందంగా చూపించిన పాటకు సాయి పల్లవీ డాన్స్త ప్రతిభ తోడయ్యింది. అప్పుడెప్పుడో విజయశాంతి లలూదరువాయే లస్కరు బోనాల్ పండ్గకు వస్తనని రాకపోతివే లసీకా పూలు గోరికి లబ్బరు గాజులు తెస్తనని తేకపోతివి తుర్ర్..... అంటూ సాగిన గీతం కూడా గుర్తుండే వుంటుంది.
ఇకపోతే నిన్న కాక మొన్న విడుదల అయిన కృష్ణార్జున యుద్ద సినిమాలో అచ్చంగా రాయలసీమ జానపద బాణీని అచ్చంగా పరిచయం చేస్తూ సాగిన పాట దారి చూడు దుమ్ము చూడు అంటూ దుమ్ము దులిపేస్తోంది. @Penchanadas Putta రాసి పాడిన ఈ పాటకు హిప్ హాప్ థమిజ(ఆదిత్య) సంగీతం, నానీ డాన్స్ అండ్ యాక్షన్ లోని చక్కటి ఈజ్ కూడా మరింత ఆకర్షణ అయ్యింది.

Thursday, 1 March 2018

అంతమే ఆరంభం : ఆత్మాయిడ్ విధ్వంస సృష్టి - కట్టా శ్రీనివాస్



మెలకువ వచ్చిందా? కావచ్చు కాకపోవచ్చు ఏయే జ్ఞానేంద్రియాలు తెలుస్తున్నాయి ఓహ్ స్పర్శకూడా తెలుస్తున్నట్లుంది. అంటే నాకు దేహం కూడా వచ్చేసిందన్నమాట. అయితే కళ్ళు తెరవొచ్చు. ప్రయత్నిస్తున్నాను. నిజమే చుట్టూ ఏదో తెలుస్తోంది. నాకు కూడా దేహం వుంది. అయితే ఇది నేను మనిషిగా బ్రతికున్నప్పటిది కాదు. కానీ మనిషి దేహమే ఏం వికటించిందో నీలం రంగులో వుంది పర్లేదులే. అయితే నా అవసరం ఇంకా వుందన్నమాట ఈ తరానికి నిద్రలాంటి స్విచ్ ఆఫ్ లోకి మారకముందు ఏం చెప్పారు వీళ్ళు సెక్స్ రోబోట్స్ వల్ల ఏర్పడుతున్న హ్యూమన్ నెట్ విధ్వంసాన్ని ఆపడం ఎలా అని కదా? నేనేం చెప్పాను. మొత్తంగా ఈ పద్దతినే ఆపేసి పాత విధానాన్ని పునరుద్దరించే విధానం చెపుతాను. నాకో దేహం ఇచ్చెయ్యండి అన్నాను కదా.
‘‘ యువర్ అటెన్షన్ డియర్ ఆత్మాయిడ్ వెల్ కమ్ టూ ద న్యూ వరల్డ్ మీకిప్పుడు దేహం వుంది. మీరు ఇండిపెండెంట్ గా ఆలోచించే శక్తికూడా అలాగే వుంచాం. మీనుంచి మాకు ఈ పరిష్కారం కావాలి.’’ అదే గొంతు వినిపిస్తున్న వైపు చూసాను. ఈ మెషిన్ ను మనిషి అనొచ్చా, శరీరం మరీ పాములా పాకుతూ వుంది.

Wednesday, 28 February 2018

కట్టా శ్రీనివాస్ || జయహో కవిత్వం ||

నువ్వొక పద్యాన్ని మరింత దగ్గరగా విశ్లేషించావంటే దాన్నిక నాశనం చేసినట్లే,

వేరొక పద్యాన్ని ఘాటుగా విమర్శించినా అదేమీ తన దారి మార్చుకోదు.

ఒకవేళ పద్యాన్ని దూరంనుంచే పరామర్శించాలనుకున్నావనుకో అది నీ నుండి మరింత దూరమై పోతుంది.

అణువణువూ విడగొట్టి చూడాలనుకున్నావా! ఎదురయ్యేదానికి ముందే సిద్ధపడిపో..

నీవు దాన్ని నిర్లక్ష్యం చేశావనుకో అది నిన్ను మరెవరికో వదిలేసిపోతుంది.

 పద్యం దగ్గరకు నీవుగా తిరిగొస్తే అది అర్థమై ఎదిగిపోతుంది.

ఒక పద్యాన్ని కంఠతా చేశావనుకో నీ పయనం ఎటో ఎరుకవుతుంది.

సరే ఇక ఆఖరుగా ఒక్కమాట
నీవు పద్యాన్నే అర్ధం చేసుకుందామనుకున్నావనుకో దాని పదజాలంలోకి అచ్చంగా దూకేసేయ్ సరిపోతుంది.

తేదీ: 02-02-2018

ఆత్మాయిడ్ ఎట్ ఆండ్రాయిడ్ - కట్టా శ్రీనివాస్


‘‘ డియర్ యన్ ఐ సెక్స్ రోబోట్ ల వల్ల మానవజాతికి ఏర్పడిన ముప్పుకు మీరు ఏదన్నా పరిష్కారం చూపించగలరేమో అనే మిమ్మల్ని జ్ఞాన సుప్తావస్థనుంచి మేల్కొలిపాం. హలో మీకు వినిపిస్తోందా? ’’
ఒక మృదువైన ఆడగొంతు మాటలనుకుంటా అవి. నిద్రలోంచి లేవకముందే ఏదో ఛానల్ వింటున్నట్లుగా వుంది. కానీ కళ్ళు తెరవడానికి రావడంలేదు అసలు కళ్ళు కాదు కాదు దేహం వున్న ఎరుకే కలగటం లేదు. అసలు నేనెక్కడున్నాను. ఇంకా మెలకువ రాలేదా?
‘‘ హలో హలో మైక్రో ఫోన్ చెక్... యన్ ఐ యన్ ఐ మీకు వినిపిస్తోందా? సమాధానం చెప్పండి, ఈ భాష మీకు తెలిసిందే కదా? 2020 ప్రాంతంలో మీరు వాడిన భాషే కదా?’’
నాతోనే ఎవరో మాట్లాడాలని ప్రయత్నిస్తున్నారన్నది నిజం. మాటపెకలించే ప్రయత్నం చేసాను. కళ్ళుతెరవని చీకట్లోంచే దేహం స్పృహకోసం వెతుక్కోకుండానే నా మాటను బయట పెట్టే ప్రయత్నం చేసాను.
 నేను ఎ..హె..క్కడా ఆ వున్నా....ను ఊ.. అది నా గొంతేనా ఏదో అపరితమైన యంత్రపు గొంతులా వస్తోంది.

Wednesday, 14 February 2018

కోరంగి అభయారణ్యం ఒకప్పటి ప్రాచీన నౌకా వాణిజ్య కేంద్రం


మా స్కూల్ కొలీగ్స్ తో కలిసి శివరాత్రికి ముందురోజు కాకినాడ కొరింగా అభయారణ్య ప్రాంతం చూసివచ్చాం. వర్షాకాలం వెళ్ళిన తరువాత అక్టోబరు నుంచి మే వరకు కోరింగ అభయారణ్యాన్ని సందర్శించడానికి అనువైన సమయం. నవంబరు నుంచి ఫిబ్రవరి వరకు వలస పక్షులను చూడవచ్చు. జనవరి నుంచి మార్చి నెలల వరకు  సముద్రపు తాబేళ్ళు, సముద్ర తీరాన గుడ్లు పెట్టడానికై వస్తాయి. సంవత్సరంలో 12 నెలలూ ఈ అభయారణ్యాన్ని దర్శించవచ్చు ఐతే  దర్శించటానికి నవంబరు, డిసంబరు నెలలు  అత్యుత్తమమైనవి. జీవవైవిధ్యాన్ని ప్రత్యక్షంగా చూపడానికి, విజ్ఞానాన్నీ, వినోదాన్నీ ఒకే చోట పొందడానికి ఎకో పర్యాటకం - మడ అడవుల సందర్శన ఎంతగానో ఉపయోగపడుతుంది. రంగురంగుల పడవలు, చిత్తడినేలలు, సముద్రపు గాలీ ఎంతో ఆహ్లాదాన్ని కలిగిస్తాయి.  ఒకవైపు పిక్నిక్ సరదాతోపాటు చాలా విశేషాలు తెలుసుకోగలిగాం కొన్ని మీతో పంచుకుంటాను.
కొరింగి మండల కేంద్రమైన తాళ్ళరేవు నుండి 2 కి. మీ. దూరం లోను, సమీప పట్టణమైన కాకినాడ నుండి యానాం దారిలో 18 కి. మీ. దూరంలోనూ ఉంది. నది సముద్రంలో కలిసే ప్రాంతం నదీసంగమం ఇది సహజ ఓడరేవుగా పనిచేస్తుంది. మనం భారతదేశంలో ఇప్పుడు చెప్పుకుంటున్న పెద్దఓడరేవులకంటే ముందు మన దగ్గర విశాఖ ఓడరేవు కంటే ముందు అతిపెద్ద ఓడరేవుగా వున్న ప్రాంతం కొరింగి. ఎంత అంటే తూర్పుగోదావరి జిల్లా అధికారిక గెజిటీర్ల ప్రకారం భ్రిటీష్ కాలంలో ఓడరేవు అంత్యదశలో వుందనుకున్న కాలంలోనే లక్షలాది రూపాయిల వ్యాపారం నిర్వహించిన ఓడరేవు అంతకు ముందు కోట్ల రూపాయిల వ్యాపారం నడిచేదట. ఇప్పుడంటే కోటి రూపాయిలు చిన్నమాట కానీ అప్పట్లో రూపాయి విలువ డాలరును మించి వున్న రోజుల్లో, రూపాయికి పదహారు అణాలు అణాలో 12 వ వంతుకు కూడా కడుపునిండేంత తిండి దొరికే రోజుల్లో లక్షాదికారి అంటేనే మామూలు విషయం కాదు కదా. క్రీస్తుకు పూర్వం నుంచే పురాతన సంస్కృతివున్న సహజ ఓడరేవు కొరింగీ ప్రకృతి వైవిధ్యం వున్న కొరింగి ప్రకృతి వైపరీత్యాలే కాక బ్రిటీషువారి ఈర్ష్య పూరిత మనస్తత్త్వం వల్ల కూడా మరుగున పడిపోయింది.  ఆ చారిత్రక శిధిలాల పై ఇసుక మేటలు వేస్తూ ఆ నాగరికతా శకలాలలను సంవత్సరానికి ఇంత అంటూ ఇప్పటికీ కప్పెట్టుకుంటూ వస్తోంది.,

కొరంగీ లని తెలుగు వాళ్ళని ఎందుకు పిలుస్తారు?

కోరంగి అభయారణ్యంలో జీవన వైవిధ్యం

ఫేస్ బుక్

Tweets

లంకెలు