Wednesday, 20 February 2019

ప్రొద్దుటూరులో ఊరూరా కవిసంగమం సిరీస్ 10

ఈసారి ఊరూరా కవిసంగమం పొద్దు మరో చారిత్రక పట్టణంలో పొడిచింది. తన అనువాదాలతోనూ అంతకు మించి ఆప్యాయత లతోను కవిత్వంకోసం ఇష్టంగా కష్టపడే సి వి సురేష్ గారి సారథ్యంలో ఒక సైన్యంలా పనిచేసిన ఆ ప్రాంతమిత్రుల శ్రమతో ఈ కార్యక్రమం ఒక చక్కటి రూపంలో జరిగింది. కవిసంగమం సమూహంలో @Rajeswari Ramayanam గారు ఇప్పటికే సమావేశ విశేషాలను కూలంకషంగా వివరించారు. నాకు ముచ్చటగా అనిపించినా మరికొన్ని విశేషాలు మిత్రులతో పంచుకుంటాను.

ది 17-02-2019(ఆదివారం) ప్రొద్దుటూరులోని స్త్రీ శక్తి భవన్ ప్రాంగణంలో కలుసుకున్నాం. ఆ ప్రాంత కవులు పెద్దలతో పాటు హై స్కూల్ కాలేజ్ చిన్నారులు కూడా హాజరయ్యారు. ఈ పిల్లలంత ఎలా తెలుసుకుని వచ్చారు అని సురేష్ గారిని అడిగితే ఒక పాంప్లెట్ చేతిలో పెట్టారు. పదిరోజుల ముందునుంచే విద్యార్థులకు కవితా పోటీలు ఉన్నాయన్న సమాచారం అది. సరే కార్యక్రమం మొదలవడానికి మరికొంత సమయం ఉండటంతో అక్కడున్న పిల్లలతో మాట్లాడటం కుదిరింది. వాళ్ళు రాసిన కవితకు సందర్భం ఏమిటి? ప్రేరణ ఏమిటి? ఆ పదాలను వాడటంలో ఉద్దేశ్యం ఏమిటి? లాంటి ప్రశ్నలకు పిల్లలు ముచ్చటగా గౌరవంగా ఇంటర్వ్యూ సమాధానాల్లా చెప్పడం ఆశ్చర్యం అనిపించింది. పదాలు dictation పెట్టినా రాయలేకపోతున్నారు అని సర్వేలు చెపుతున్న రోజుల్లో భావానికి పొసగే పదాలు ఎంచుకుని మరీ రాసిన వీళ్ళు నాకు ఆశ్చర్యమే కదా!! అలా మాట్లాడుతుండగానే హరికృష్ణ అనే ఒక బుజ్జోడు చకా చకా పెన్సిల్ తో @Kavi Yakub సర్ బొమ్మ గీసేస్తున్నాడు. వాడు ఎంత ఏకాగ్రతగా నిమగ్నం అయ్యడంటే ఆహూతులతో మాట్లాడుతూ యాకూబ్ గారు అటూ ఇటూ కదిలినా విసుక్కుంటూ కూర్చోమని కోపంగా సైగ చేసేంత. మరో అమ్మాయి ఒక పుస్తకం నిండా వేర్వేరు సందర్భాలకు తన స్పందన కవిత్వంగా రాసుకొచ్చింది ప్రస్తుతం D El Ed చేస్తోందట నిజానికి ఆ పాపకు కంటిచూపు కూడా చాలా తక్కువ అటువంటి పరిస్థితిలో అటు చదువుతూ ఇలా ఇంత కవిత్వం రాయడం ఎలాకుదిరిందమ్మ అంటే నేను కొన్ని సినిమా స్టోరీ లు కూడా రాసాను తెలుసా సర్ అంటుంది. వేరే పిల్లలకు వల్ల కాలేజ్ లో ఏవో కార్యక్రమలు వదులుకుని వచ్చారు. ఇక్కడ మాటలు కవిత్వం వినేసి త్వరగా వెళ్లి అక్కడ కూడా పాల్గొవాలని వల్ల టైం management పోనీ హడావుడి ఉంటే వెల్లకపోయారా అన్నసరే వల్ల మనసు ఇక్కడే ఊగిసలాడుతోంది.


అంతలో అనుకోకుండా అప్పటి వరకు వచ్చిన కవిత్వంలో మరింత బాగున్నవి ఎంపిక చేయమని @Srinivas Vasudev గారికి నాకు జడ్జిమెంట్ పని అప్పగించారు. అయితే కవిత రాసిన ఏ ఒక్కరూ తక్కువ కాదు ప్రతివాళ్లకు బహుమతి ఉంది అనిచెప్పక మాకు ఈ కష్టమైన పని మొదలుపెట్టే ధైర్యం వచ్చింది. పైగా కనిగిరి నుంచి వచ్చిన మిత్రులు భాస్కర్ కె గారు కూడా మాకు సాయంగా వుంటానన్నారు. ఇంకేం కార్యక్రమంలో ఒక పక్క @LN Gunturu గారి కీలకోపన్యాసం కవిత్వం ఏమిటి? ఎందుకు లాంటి వాటిపై ఒక తూగులో సాగుతోంది మేము ఒక చెవి అటువేసి వింటూనే, ఇటు పిల్లల కవితలు జడ్జ్ చేయటం మరిచిపోయి వీళ్ళు పిల్లలేనా అని అబ్బురపడటం కూడా చేస్తున్నాం. ఇంకా ఎక్కడెక్కడి మిత్రులొ అక్కడ పలకరించాల్సిఉంది.


రాజేశ్వరి రామాయణం గారు కుటుంబంతో సహా కార్యక్రమ నిర్వహణ బాధ్యతలతో వున్నారు, ప్రభుత్వ హై స్కూల్ పిల్లలంటే ప్రతిభలోనూ హై గానే వుంటారన్నట్లు ముద్దనూరు పాఠశాల పిల్లలకు కన్న తల్లిలా కాచుకుంటు పిల్లలను పొగిడితే పుత్రోత్సాహం తానే పొందుతూ ఒక పక్క వెంకట సుబ్బమ్మ గారు గాంధారి ఖిల్లాలో(మంచిర్యాల) మొన్నీమధ్య ఊరూరా కవిసంగమం కార్యక్రమం నచ్చిన యామిని రెడ్డి గారు, గీత చల్లా శిలాలోలిత మేడంలతో కలిసి శ్రద్ధగా కార్యక్రమం పరిశీలిస్తున్నారు.
పీర్ల మహమూద్ గారు, బసవరాజు వేణుగోపాల్ గారు మురళి కృష్ణ గారు నిశ్శబ్దంగా కార్యక్రమ ఏర్పాట్లలో తమతోడ్పాటు నిస్తున్నారు. కుప్పం నుంచి వచ్చిన పల్లిపట్టు నాగరాజు, హైద్రాబాద్ నుంచి సుగుణశ్రీ బిరుదు మాకు మరో అబ్బురం. ఒక చిన్న కవిత్వ కార్యక్రమం పై ఇంత ఇష్టం చూపించి ఎంతో దూరప్రయాణాలు చేసి సమయాన్ని ఖర్చు పెట్టగలుగుతారా అని. బహుమతులు అందుకున్న చిన్నారుల కవితా పఠనం మేము పెద్దవాళ్లకు మా కవితను వినిపిస్తున్నాం అన్న ఉద్వేగ పూరిత ఉత్సాహం మాకు స్పష్టంగా కనిపించాయి. అప్పుడు అర్ధం అయ్యింది ఇంత ఖర్చు పెట్టి సురేష్ గారు కార్యక్రమం నిర్వహించింది తన వెలుగు కనిపించాలి అని మాత్రమే కాదు మరి కొన్ని దివ్వెలను వెలిగించాలి అనికదా.
మానవ వికాసం కోసం కవిత్వం అనే నినాదం వారి నవ్వులతో పాటు ఆ ప్రాంగణమంత పరిమళం పంచుతున్నట్లే ఉంది. రెండు రోజుల మా పర్యటనలో మరెన్నో విశేషాలు ఒక్కొక్కటే మీతో వరసగా పంచుకుంటాను. ఇప్పటికి సెలవు


Thursday, 31 January 2019

కొనుగోలు మార్కెట్లను ఊపేస్తున్న ఆహారప్రవక్తలు

కొనుగోలు మార్కెట్లను ఊపేస్తున్న #ఆహారప్రవక్తలు

#KattaSrinivas

మీరు ఆరోగ్యంగా వుండాలంటే ఇలాంటివి ఈ విధంగా తినాలి, లావుగా వున్నారా? వెంటనే తగ్గాలా? షుగర్ వ్యాధి చిటికెలో పోవాలా? డాక్టరుతో పనిలేకుండా యాక్టివ్ గా వుండాలా? ఈ టాపిక్ తో వస్తున్న ఉద్యమాలు జనం ఆరోగ్యస్ప్రుహను అనేక విశ్వాసపు ఆచరణల గాడుల్లో నడిపిస్తున్నాయి. ఒక్కో ఉద్యమం మర్కెట్లోను కొన్ని వస్తువుల వినియోగాన్ని అమాంతం ఎన్నోరెట్లు పైకి లేపుతున్నాయి.  అయితే ఇందులోనూ కొన్ని గందరగోళాలున్నాయి. మాంసం గుడ్లు అసలు తిననే వద్దంటారు ఒకరు, అవే ఆరోగ్యానికి మంచిదంటారు మరొకరు. తేనే కొబ్బరినీళ్ళు, గోధుమ రొట్టె భలే మంచిదంటారు ఇంకొకరు, అసలవి డైట్ లోవున్నంతకాలం వాడనే కూడదంటారు మరోకరు. డాక్టర్లలో చాలామంది డబ్బుల మనుషులు వాళ్ళు చెప్పిందాంట్లో చాలా తప్పులే అనేసారు చేదుమందుబిళ్ళల వెగటును ఈ మాటలు మరింత బలపరిస్తే ఇప్పుడొచ్చిన కొత్త సందేహాలు ఎలా తీర్చుకోవాలో అర్ధం కాదు. కనీసఆరోగ్యకాముకలకు. అసలే ఆహార కల్తీ ప్రపంచం, ఆపై బోలెడంత కాలుష్యం, అడ్డదిడ్డమైన వాతావరణం ఎప్పుడెంత ఎండ చలి తీవ్రత వాన రాకడ అర్ధంకాని పరిస్థితులు పైగా ఉరుకుల పరుగుల జీవితాలు. పోనీ వాకింగ్ ఒక్కటన్నా చేసుకుని సంతోషపడదామా అంటే అదే సర్వరోగనివారిణి అని ఎంతబాగా అంటున్నారో మరోమూలనుంచి అసలు కీళ్ళు అరిగిపోయే ప్రధాన కారణం అదేసుమా జాగ్రత్త అంటారు మరోమూల.  ఈ నేపద్యంలో తినేందుకు ఖర్చుతప్ప్రదు ఎవరన్నా ఆరోగ్యంగా వుండేందుకు మంచివిధానం చెపితేబావుండనే కోరిక తీవ్రతను ఇప్పుడెన్నో విధానాలు తాముగీసిన గాడుల్లో పరుగులుపెట్టిస్తున్నాయి. ముఖ్యంగా కొత్తగా ఒకటి రాగానే మరింత ఆకర్షణీయంగా వుంటోంది దానిలోని లోపాలు ఇబ్బందులూ ప్రచారం అయ్యేంత వరకూ మరొకటి రీప్లేస్ చేసేంత వరకూ అది ఒక స్థాయిలో వుంటోంది. ఎంతగా అంటే ఈ ఆహార ప్రవక్తలు ఎవరైనా ఎన్నికల్లో పోటీ చేస్తే సులభంగా పేరు అర్ధం అయ్యేంత పాపులారిటీ వేరే ఖర్చులేవీ లేకుండా వచ్చేస్తోంది. పైగా ఈమధ్య ఆధునిక ఫోన్లూ వాటికి సులభమైన రేటులో నెట్ సదుపాయం వచ్చిన నేపద్యంలో ఇది మరీ సులభం అయ్యింది. విషయం వినాలనుకున్నవారు వేదకల దగ్గరకే వెళ్ళాల్సిన పనిలేదు. వీళ్ళు కష్టపడో ఖర్చుపెట్లో పత్రికలూ, టీవి లపై ఆధారపడాల్సిన పనీలేదు. యూట్యూబ్ విడియోలూ, సోషల్ మీడియాలో సమాచారాలూ కాంతివేగంతో దూసుకుపోతున్నాయి. ఒక్క వాట్సప్ విడియో మారుమూల  గ్రామీణ మహిళను ఉన్నపళంగా ప్రముఖ గాయనిగా మార్చి సినిమాల్లోనూ, టివీకార్యక్రమాల్లోనూ, సామాజిక మాధ్యమాల లోనూ ప్రముఖురాలిగా స్థానం కల్పించింది. అదే కోవలో ఆహారవిధానాల ప్రచారాలు కూడా ఇప్పుడు వేగంగా జనంలోకి దూసుకుపోతున్నాయి. దీన్ని ప్రారంభించినవాళ్లే ఆశ్చర్యపోయేంత విస్త్రుతమై మార్కెట్ పై సైతం తమ విరాట్ రూపం చూపిస్తున్నాయి. సరే కొనుగోళ్ళు ఖర్చులు డబ్బుల సంగతి అలాపెడదాం. వృధాలోకి ప్రవహించే అనేక కష్టపు చుక్కలలో ఇది మరొకటి అనుకుందాం కానీ ఆరోగ్యంపై సరాసరి ప్రయోగాలు చేస్తున్నప్పుడు చిన్నపొరపాటువల్ల తప్పుడు అవగాహనవల్ల, తొందరపాటు నిర్ధారణలవల్ల ఆచరణలోకి వచ్చిన విషయం దీర్ఘకాలంలో దుష్పలితాలను ఇస్తే ఎలా? దానిపై భాద్యత ఎవరు వహిస్తారు? శాస్త్రీయంగా ఇటువంటి కోర్సులు చదువుకున్నవారు పెద్దగా పట్టించుకోరు. ఆహారకల్తీ చట్టాలుంటాయి, ఆరోగ్య సంరక్షణ చట్టాలుంటాయి. మెడిసిన్ అండ్ డ్రగ్స్ యాక్ట్ లుంటాయి కానీ అసలు ప్రభుత్వంకానీ ఆరోగ్య శాఖ కానీ కుంభమేళాలకో, తిరునాళ్ళకో స్పందిచినట్లు కూడా ఇటువైపు చూడాలనుకోదు. కనీసం నిపుణుల ఆధ్వర్యంలో ఒక కమిటీ కానీ, ప్రయోగ పరీక్షలకు ప్రాసెస్ చెయ్యడం కానీ తమ భాద్యతగా ఏలినవారు భావించరు. తమ ఓట్లపై ప్రభావం చూపని విషయాలపై దృష్టిపెట్టడమే ఒక తెలివితక్కువ పని అన్నట్లు తమ వలలూ గాలాలూ అల్లుకునే పనుల్లో నిరంతరం బిజీగానే వుంటుంది. డైట్ ప్లాన్ ఎంత క్రేజీగా వుంటే అంతపాపులర్ అవుతున్న చిట్కా నేపద్యంలో రేపెవ్వరో వచ్చి కీటోడైట్ లాగానే ఆల్కహాల్ డైట్ ని భుజాన వేసుకుని ప్రచారం చేసారనుకోండి. నిజమేనండీ ఆల్కహాల్ డైట్ తమాషాగా అనడంలేదు వీలయితే నెట్ లో వెతికి చూడండి . అప్పడు హమ్మయ్యా ఆబ్కారీ ఆదాయం పెరిగిందిలే అనుకుంటుందా ప్రభుత్వం?
ఆరోగ్య శాఖ, మెడికల్ కాలేజీలూ, రీసెర్చ్ సెంటర్లు సమన్వయంలో ఇటువంటి వాటిపై తీసుకోవలసిన చర్యలగురించి ఇప్పటికైనా ఆలోచన ప్రారంభించాలి. రోగాలబారిన పడకుండా మంచి ఆరోగ్యంతో వుండాలన్న ప్రజల తీవ్రమైన కోరికకు సరైన శాస్త్రీయ మార్గం చూపే ప్రయత్నాలు జరగాలి. కొన్ని విషయాల్లో ఇదిమిధ్దంగా ఇదే మంచిది ఇది మాత్రమే మంచిది అని ప్రయోగాల ద్వారా సైతం తేలకపోవచ్చు. కానీ ఇది ప్రమాదం దీనివల్ల ఇటువంటి దీర్ఘకాలిక నష్టాలు సంభవించే అవకాశం వుంది అనేవాటిని వెలుగులోకి తీసుకారవలసిన అవసరం కూడా వుంది.

https://m.facebook.com/story.php?story_fbid=2304087102949128&id=100000435816359

Sunday, 20 January 2019

కట్టా శ్రీనివాస్ || బతుకులో లైఫ్ ఉందా?||



1
మొక్క ఒకటి మౌనంగా తలూపుతోంది.
..
జీవితంలోంచి జీవం కరిగిపోతే
బ్రతికేవుంటామేమో కానీ
గడిచే ఏ క్షణంలోనూ ఆసక్తి మెరుపు ఉండదు.
జీవం అంటే ఏంటో తెలుసుకుందామని స్పటికపు కళ్లలోతుల్లోకి ఎంతసేపో చూస్తుంటాను.
2
కష్టజీవి నడుస్తూ నవ్వుతున్నాడు.
..
టూత్ పేస్ట్ లో ఉప్పు వుందో లేదో
బతుకులో లైఫ్ ఉందా?
బతకడాన్నే జీవించడం అనుకుంటున్నామా?
లైఫ్ లైన్లు వాడుకునే హడావిడిలో
లైఫ్ అంటే ఏమిటో అసలు పట్టి చూడటమే లేదా?
అక్షరమే ఎరగని చెమటచుక్క దర్పంతో ఎలా ఉందా అని ఆశ్చర్యపోతుంటాను.
3
పండు ముసలి మందహాసం గుండెల్లో పరచుకుంటోంది.
..
కరెంట్ తీగ అనాలంటే లోహం ఉంటే చాలా?.
కనబడకుండానే ప్రవహించేది పనిచేసేది ఒకటుండాలి  కదా!
అనుభవమంతా రాసిపోసుకున్న దేహపు మిగిలిన నడకలో వెలుతురు ఏమిటో అర్ధం కానే లేదు నాకు.
4.
పిట్ట గూడు కట్టుకుంటూ కిచ కిచ మంటోంది.
..
పొట్ట, నాలుక, జేబు, చర్మం, ఇనప్పెట్టె, పాస్ పుస్తకంలో అంకెలు లాంటివే చోదక శక్తులయినప్పుడు
దేహారాధన దానితో పాటే ముగిసిపోతుంది.
నీ సంతోషాన్ని వేరే మనసుల్లో విత్తనాలుగా నాటిచూడు.
అనేక నువ్వులు నీ తర్వాత కూడా భలే పచ్చగా నవ్వుతుంటాయి.
వేలాడుతున్న బరువులని విసిరేశాక రోజుని హాయిగా ఈది చూడు, ఉల్లాసం నీ వెంటే పరిగెడుతుంటుంది.
నోట్లు తెలియక, భాషే రాక, ఆస్తులు లేక అచ్చమైన జీవితం ఒకటి నిజంగా ఉంటుందా?
5.
చిట్టిపాప బోసినోటితో ఆదమరచి నవ్వుతోంది
..
గ్రాంఫోన్ ప్లేటు గానుగెద్దు పతాక చిహ్నాలుగా రెపరెప లాడుతుంటే పనినడుస్తున్నట్లే ఉన్నా పస ఉన్నట్లు కనిపించదు.
పైరగాలి, పైటగాలి, పిట్టకూత పరవశాన్నివ్వకపోతే
వశం వరమా? శాపమా?
నిన్ను అసలు నడిపించేది ఏమిటి?
6.
సిద్ధార్థుడే చూస్తాడా? వేర్వేరు దృశ్యాలు
సమయం ఉంది బుద్ధా!!
చుట్టూ చూస్తూ నడువు.
సరే సరే...
ఇదంతా గందరగోళంగా ఉందా
కంగారేమీ పడకు మిత్రమా
జీవితం అంతే గజిబిజి గానో బిజీ గానో ఉంటుంది.
చిట్టిపాప, పిట్టగూడు, కష్టజీవి పచ్చనాకు, పండుటాకు అన్నీ నీ చుట్టూతానే ఉన్నాయి.

Friday, 18 January 2019

కట్టా శ్రీనివాస్ || పారడాక్స్కి జేజమ్మ||

కట్టా శ్రీనివాస్ || పారడాక్స్కి జేజమ్మ||

భయపెట్టే అందం
కంగారు పుట్టించే కమ్మదనం
కళ్ళతో తాకినంత నోటితో తాకనేలేము.

పచ్చగా ఉన్నప్పటికంటే
పండిపోయిన తర్వాతి సొగసరి ఇది.

నునుపో ఎరుపో కాదు నీ కరకుదనమే గుర్తింపు తెలుసా?

కష్టాల ఎండలో చప్పబడిపోకుండా
మరింత ఆటిట్యూడ్ పెంచుకునే నువ్వంటే నా కిష్టం.

తేదీ 18-01-2019

Friday, 4 January 2019

సావిత్రీభాయి పూలే || కావ్యాపూటే ||

సావిత్రీభాయి పూలే || కావ్యాపూటే ||
తెలుగుసేత కట్టా శ్రీనివాస్

======1=======

మీకు జ్ఞానమంటూ లేకపోతే విద్యరానట్లే
మీకేమో దానిపై తపనలేదు.
మీరు తెలివితేటలు ప్రదర్శిస్తుంటారు కానీ దాన్ని సంపాదించేపనిచేయరు.
మిమ్మల్నిక మనిషని ఎలా పిలవను?





======2========

పశువులు పక్షులు కోతులు మనుషులు
అందరూ జీవనం నుంచి మరణం దాకా ప్రయాణించేవారే.
కానీ ఈ విషయమై నువ్వేమాత్రమూ అవగాహన పెంచుకోకపోతే
మిమ్మల్నిక మనిషని ఎలా పిలవను?




======3=======
నిమ్నుల నుదిటిరాత
‘‘నేలపైని దేవుళ్ళ’’ చేత రాయబడుతోంది.
రెండువేల ఏళ్ళ పైనుంచీ అగ్రవర్ణ కైంకర్యసేవ
శూద్రజాతికి నిత్యకృత్యమవుతోంది.
వారి దీన దుస్థితిని చూస్తుంటే
హృదయం నిరసనతో చెమర్చుతుంది.
మెదడు గిజగిజకొట్టుకుంటుంది ఈ ఉచ్చులోంచి
బయటపడే దారివెతుక్కుంటూ
మిత్రమా
చదువొక్కటే దారి బయటికి నడిచొచ్చేందుకు
చదువుకొంత మనిషితనాన్ని ప్రసాదిస్తుంది.
లోపటిమృగం ఉనికినుంచి విముక్తం చేస్తుంది.



Tuesday, 1 January 2019

యశస్వి సతీష్ ||ఏడాదికే అన్న||

యశస్వి సతీష్
(సాహితీబంధువు తోడబుట్టని సోదరుడు అత్యంత ఆత్మీయుడి యశస్వి సతీష్ జనవరి1 న నా పుట్టిన రోజు సందర్భంగా రాసిన ఆత్మీయ వాక్యాలు ఇవి)
కట్టా శ్రీనివాసు ఏమైనా చుట్టమా, నేస్తం అంటే కేవలం ఇష్టమేనా అంటే ఏమో!
కవిత్వాన్ని తల్లి లీలావతి అనుకునే లెక్క లేని పద్యం సోదరుడు, అమ్మ గిరిజావతి వల్లె వేయించిన పాదాల్ని పట్తుకుని ఇంతదూరం నడిచొచ్చి కవిసంగమంలోనే కలిసాను, సూఫీఘర్ ములాకాత్ లు మావి. సారమున్న మనిషి తనం తనది..
బంధుత్వాలు లేకున్నా సోదరుడు అనుకోవడం వెనుక క్విడ్ ప్రోకో ఏం లేదు, నిండుగా నవ్వేందుకు, తనివిదీరా ఏడ్చేందుకు. నేను ఏడుపును మాటల్లో పెడతా, తను నవ్వేసి నను తేలిక చేస్తాడు. “నువ్వూ, నేను ఏకవచనమై దూరంగా వున్నా, మనమనేది నిజమే ననే దీపపు వెలుగుల ఓ చిర్నవ్వునివ్వు.. తన పద్యాన్నే అప్పజెప్పాను ఓనాడు. నవ్వేశాడు. అలాగే సోదరా అంటూ. అప్పుడు కట్టుకున్న రాఖీ రోజు రోజుకీ ముడి బిగిసింది గానీ వదులు కాలేదు.
గుద్దులకు రోడెక్కుతారుగానీ, ముద్దులకు మదగ అవసరం కదా. ఎంత ఇష్టామైనా ఇలా ఓ మాట చెప్పుకోవడానికి ఈ రోజు కొత్తసంవత్సరం తెర ఎత్తాక గానీ కుదరలేదు. అందునా నాకన్నా ముందే ఏడాదికి అన్నవీడు,...
జనవరి ఒకటో తారీకునే ఈ పండగనాడే పుట్టేశాడు. పండుగంటేనే తలచుకునే ఒక సందర్భం, దేవుడ్నీ సంతోషాన్ని. ఇదిగో ఇలాంటోడ్ని, లేదా పాపం తగిలి లావైపోనూ!
కంట్లోల్ వీ మాటల్లో చెప్తున్నాననే అనుకోండి, కొత్తదనం కోసం ఐ లవ్ యూ ని మార్చి చెప్పలేం, మనసు వెచ్చదనం కోసం హత్తుకోవడాన్ని మార్చడానికి నియమాలు ఒప్పుకోవు. కవితాకేళి లేకపోతే విడివిడిగా ఎగురుతున్న ఇద్దరి మధ్య దారపు బంధం కనిపించదు ఎవరికీ. ఎన్నింటికి రుణపడిపోవాలో ఈ వేదికకి! అన్న యాకూబ్ కీ. బంధాలనూ, స్నేహాన్ని, వృత్తిని భాద్యతగా కాకుండా ప్రాణంగా చూసుకునేవాళ్ళెవరు కనిపించినా అదికూడా అమ్మే అనిపిస్తుంది అంటాడు ఈ నాన్నపేగు.
అనుక్షణం అండగా ఉండడం, ఆలోచనలో తోడుండడం, తన జ్ఞాపకం తడిగా ఉండడం ఎక్కడ ఉన్నా నా నీడని పలుకరించే వెలుగుతోడు నీ అంతర్లోచన వాక్యాలు. మనుషులర్ధం కావాలంటే లోపటి లోకాల ఊసులు తెలియాలి. గుండె లోపలికి ప్రేమను ఒంపుకుని చాపే చేతులతో హృదయాల్ని అందుకోవాలి. అది నీకు తెలిసిన విద్య కట్టన్నా. అందుకే నువ్వు చానా ఇష్టం.
నీరోజును నువ్వు నీలానే గడిపేస్తుండేటప్పుడు, లోకం మొత్తం ఆనందంగా ఉండడానికి ఆరాటపడుతున్న ఘడియల్లో ఈ తాటాకు చప్పుళ్లెందుకు అంటావా.. అది నా ఇష్టం.
నిలిచిపోయిన మురికినీళ్ళ సాగరం మధ్యలో కవిగా నా బొమ్మ ఉండటం కంటే, పరుగులెత్తే లక్షల కళ్ళ వాకిళ్ళున్నమెట్రో ప్రవాహపు గోడలపై నావి నాలుగక్షరాలు అంటిస్తే సంతోషపడతాను. ఇదేమాట నువ్వు కాకుండా ఇంకెవ్వడన్నా అనుంటే ఈ పాటికి ఓ విగ్రహం నిలబెట్టి దానికి నీ పేరెట్టి.. కింద ఈ మాటల్ని చెక్కిపెట్టేవారు. సదరు పేరు మీద ఓ అవార్డు కూడా పెట్టుండెవారేమో,
మామిళ్ళపల్లి పందిరికింద నీసుమమే అమృతలతై తొంగిచూస్తున్నప్పుడు ఏ కొలతకు దొరుకుతావు నువ్వు! కౌగిలింతకు తప్ప..
అందుకే ఈ బంధనం.
నా పేరు పలికితే రుచి ఏం తెలుస్తుంది! కళ్ళారా అనుభవించు.. ఈ ఏడాదంతా
వీలైతే నాలాంటోడ్ని జీవితాంతం. ఇలానే.


Wednesday, 14 November 2018

రాస్తున్నానేమిటి?

లోకమంతా నిస్సారంగా
కనిపిస్తోంది ఏమిటి?
బహుశా నేనే
రుచిని
కోల్పోయివుంటాను.

కళావిహీనంగా వుందేమిటి?
మనసు అద్దం
రంగులు వెలిసిపోయింటాయి.

కవిత్వం మనిషిని మృదువుగా మారుస్తుందా?



 యశస్వి సతీష్ గారి పరాం ప్రేయసీ పుస్తకంపై లేఖా రూప స్పందన ఇది


కవిత్వం మనిషిని మృదువుగా మారుస్తుందా?

సోదరా యశస్వీ మీ పరాం ప్రేయసీ చదివిన తర్వాత మూడు సందేహాలతో ఈ ఉత్తరం రాస్తున్నాను.
ఒకటి అంతా ఆన్ లైన్ అయిపోయిన తర్వాత పోస్టు డబ్బాలే కనిపించని రోజుల్లో ఇంకా ఉత్తారాలను చదివే వారు వుంటారా? రెండు నిజంగా మనతోనే వున్న మన సహచరిని ఇంతాలా ప్రేమించడం ప్రేమించారు పో కేవలం మనసులో దాచుకోకుండా బహిరంగంగా వ్యక్తం చేయడం సాధ్యమా? మూడోది చివర్లో చెపుతాను.
అనేక సందర్భాలలో కలిసి ప్రయాణం చేసిన వాళ్లం మీ వ్యక్తగత జీవితాన్నీ, రచనా ప్రస్తానాన్నీ, సామాజిక తపననూ గమనిస్తున్నవాడిని ఇదే పుస్తకం పేరు దగ్గరనుంచి పుస్తకం రూపు ఎలా వుండాలన్న దానివరకూ నిరంతరం ప్రశ్నలతో విసిగిస్తున్నవాడిని కొన్ని మాటలు పంచుకోకపోతే ఎలా మరి?
అప్పుడెప్పుడో రెండో శతాబ్దంలో నాగార్జునుడు తన మిత్రుడు యజ్ఞశ్రీకి రాసిన ‘‘సుహృల్లేఖ’’ కంటే ముందు ఏదన్నా లేఖలున్నా లేఖా సాహిత్యం వుందా? లేఖలో సాహిత్య సాంస్కృతిక గౌరవాన్ని కలిగే స్థాయి వుంటేనే వాటిని లేఖా సాహిత్యం అంటారట కదా. లేఖలకేం కరువు పావురాలు, పిట్టలూ వేగులూ వాటిని తెగచేరవేసే వారట కూడనూ. వాస్తవమైన వ్యక్తుల మధ్యనే అఖ్కర్లేదు ఊహాత్మక వ్యక్తుల మధ్య సంభాషణ ఇలా లేఖల రూపంలో జరిగినా దానికా ఔన్నత్యం వుంటే లేఖా సాహిత్యం సరసన కూర్చుంటుంది కదా. అభిజ్ఞాన శాకుంతలం, సూరన గారి ప్రభావతీ ప్రధ్యుమ్నమూ కాల్పనిక సాహిత్యంలో లేఖలను భలేగా వాడుకున్నారు కూడా. గుడిపాటి వెంకటాచలం ప్రేమలేఖలు, కనపర్తి వరలక్ష్మమ్మగారి శారదలేఖలు, కాటూరి వెంకటేశ్వరావుగారు తెలుగులోకి అనువదించిన నెహ్రూ లేఖలు, పురాణ రాఘవ శాస్త్రి గారు తెలుగీకరించిన శరత్ చంద్ర చటర్జీ లేఖలు మన లేఖా సాహిత్యాన్ని సుసంపన్నం చేసినవే కానీ వాటికీ మీ లేఖలకూ తేడాలు కూడా వున్నాయి. వాళ్లలో ఎవరూ సహచరిని యథాతధంగా ప్రేమిస్తూ జ్ఞాపకానికి కాక వ్యక్తికే రాసిన వారు కాదు. అందుకే నాకు ఇన్ని ఆశ్చర్యాలు. మెన్ననే మీరు పంపిన భోయి భీమన్న గారి జానపదుని జాబులు అక్కడక్కడా చదివి పోతగాని గారికి అందజేసాను. తిరుపతి వెంకట కవులూ, త్రిపురనేని గోపీ చంద్ లేఖలను సాహిత్యంగా మలచిన వారే కానీ ఆ లేఖలను అందజేసే పోస్టు మ్యాన్ కు రాసిన ఉత్తరం మన గుండెల్లో మోగించే తిలక్ రాసింది కూడా ఉత్తరమే కదా. కందుకూరి వీరేశలింగం మొదలు గురజాడ, ఆరుద్ర, కొడవటిగంటి, కె.వి. రమణారెడ్డి, బంగోరె, తదితరులెందరో లేఖా సాహిత్యానికి వన్నెలద్దారు సరే ఇదంతా చెపుతున్నాను కానీ ఈ లేఖా సాహిత్యం పై పరిశోధనలతో పి హెచ్ డీ చేసిన మలశ్రీ గారు మా ప్రాంత వాసే కదా.  మాటల మధ్యలో సిపి బ్రౌన్ ని తలచుకోకుండా ఎలా? బ్రౌన్ లేఖలు-ఆధునికాంధ్ర సాహిత్య చరిత్ర శకలాలు పేరుతో ఎన్నెన్ని ముచ్చట్లు తెలుగు నేల తెలుగు భాష గొప్పతనాన్ని చెప్పాయి. కావచ్చు కానీ ఆయా లేఖా సాహిత్యాలకూ మీ లేఖలకూ మధ్య తేడాలు కూడా కనిపిస్తున్నాయి. చూస్తే అదేదో విస్తృత జనబహుళ్యానికి మహా ప్రయోజనం కోసం అన్నట్లుగా కాక పైపైన మీతో వున్న మీ సహచరి కి మాత్రమే రాసినట్లున్న లేఖలు లోపటి ప్రపంచాన్ని ఎక్కడా వదలకుండా ఎలా తడమగలిగాయి అసలు?

Tuesday, 6 November 2018

కట్టా శ్రీనివాస్ || 🎊 వెలుతురుల వరుస 🎊 ||

మట్టి ప్రమిదకు కూడా
గట్టి ప్యాకింగుల జాడ్యం అంటుకున్నాక
పల్లె సారె పై నవ్వు ఎలా పూస్తుంది?

వెలుతురుల ప్రమత్తతకు
విషాలు నిలువెల్లా అద్దుకున్నప్పుడు
కొవ్వు లేకుండా వత్తులెలా వెలుగుతాయి?

డజన్ల అంతస్థుల షాపింగ్ మాల్స్
ఇనుపపాదాలతో వీధికొట్లను తొక్కుకుంటూ పోతున్నాయి.

సెజ్ లలో పండించిన పూలు కంటైనర్లలో ఇంటిముందుగా ఊపుకుంటూ వెళ్తున్నప్పుడు ఉన్న ఒక్క పూలకుండీ భళ్ళున మిగిలిపోయింది.

డాల్బీ డబ్బా పడి డప్పు చితికిపోయింది.
కార్పెట్ల సరసన చాప వెలిసిపోయింది.
పెట్రోలు ప్రవాహలు కండరాల బలం లాగేసుకున్నాయి.

స్వతంత్రత స్ఫూర్తిని నింపి ఒక చిన్న దీపం వెలిగిద్దాం పట్టు. వలలా పరచుకునే చీకటి కొంచెమైనా పోతుందేమో చూద్దాం.
దొరల్లాంటి దొంగలు ఊళ్ళు పంచుకునే వేళ నిజాలను డాం డాం అని పేలుద్దాం పట్టు, దోపిడీని పరిగెత్తించే ఎరుక నిద్రలేస్తుందేమో చూద్దాం.

తేదీ 06౼11౼2018 (నరక చతుర్దశి నాటి రాత్రి )

Sunday, 21 October 2018

కట్టా శ్రీనివాస్ || తడిలేని పాదు ||

కట్టా శ్రీనివాస్ || తడిలేని పాదు ||


జనాలతో కలిసేదారిలో
కరుకుముళ్ళు రాఁక్కు పోతున్ననోప్పి.
పదునెక్కిన దృక్పధాలు
గిడసబారిన మనసులు
తుప్పుపట్టిన భావాలు
కలివిడిగా వుండేలోగానే కలుక్కుమనిపిస్తున్న నొప్పి.

గుచ్చుకుంటున్నందుకు కాదు
మెత్తగా మార్చలేకపోతున్నందుకు
నొప్పి.
మెత్తబరిచే తడి ఊటే లేనందుకు నొప్పి.
మెత్తబడితే పదునులోకంలో బతకలేమనే ముళ్లపొదలు ఏపుగా పెరిగినందుకు నొప్పి.
గిడసబరిచే కేంద్రాలు లాభాల్లో తేలుతున్నందుకు నొప్పి.
బండలను ఢీ అంటూ పగలగొట్టే
గుండెల్లో సన్న ఊట చెలిమైనాలేనందుకు నొప్పి.
ఊట అనవసరం అనేదే పెద్ద పాఠం అయినందుకు నొప్పు.
ఇంతకంటే ఏమీ చెప్పలేనందుకు....

తేదీ: 21-09-2018


ఫేస్ బుక్

Tweets

లంకెలు